Сурја Намаскар: Поздравот на сонцето
Величествено славење на животот
Љубен Луј Ѓорѓиоски
Нема поголема сила од јогата,нема поголем пријател од знаењето: од Гхеранда Самхита
Јогата може да се практикува на која било возраст од животот и во секое годишно време. Со доаѓањето на топлите месеци и летото, таа добива една сосема поинаква, пред се', поприродна и амбиентална димензија. Конечно, во овие денови пред летото и во текот на неколкуте топли летните месеци, ние можеме својата јога-програма да ја практикуваме надвор, на отворен простор.
Од непресушниот извор на јога-вежби, динамичниот сет телесни вежби познати како Сурја намаскар: Поздравот на сонцето, го претставува личниот и интимен разговор на поединецот со природните витални аспекти на животот. Таа е вистинска благодарност на секој човек посветеник во јогата кон сонцето: дарителот на животот. Од најстари времиња, луѓето биле свесни и знаеле за поврзаноста на животот и сонцето. Мудрите и искусни јогини на Индија, живототворната енергија - праната свесно ја добивале, црпеле директно од природата. Нејзиниот најважен „извор“ бил, е и останува сонцето. Тоа е непресушниот вруток на живототворната енергија - прана, повеќе од четири и пол милијарди години, далеку пред времето на појавата животот и на човекот на Сината планета. Благодарение на јогините денес ја имаме јогата и нејзиниот врвен репрезент: Сурја намаскар - Поздравот на сонцето, како природен и практичен метод за будење на нашата возвишена свест.
Сурја намаскар - Поздравот на сонцето е исклучителна јога-вежба. Таа претставува серија на седум класични јога-асани, сукцесивно мудро вклопени, а некои двапати повторени кои заедно ја оформиле најграндиозната респективна, благодарност на човекот: тоа е почитта и величењето што поединецот го манифестира спрема сонцето како творец, одржувач и сублиматор на животот. Така бесмртниот творец и заштитник на јогата: Шива, му вдахнал неповторлива креативна инспирација на анонимниот творец на Поздравот на сонцето: Сурја намаскар. Непознатиот и скромен јоги ни го подари највозвишениот сегмент на јога асаните, нивниот врвен репрезент Поздравот на сонцето: како природен и, пред се', едноставно практичен метод за будење на нашата возвишена свест. Сурја намаскар - Поздравот на сонцето несомнено денес е една од главните и препразентативни „икони“ на јогата. Таа плени со својата едноставна, мудра и возвишена совршеност.
Поздравот на сонцето: Сурја намаскар претставува серија на јога-асани што лесно се вклопуваат во катадневниот животен ритам на секоја личност. Таа бара минимално време на себепосветеност, а нејзините благотворни резултати може да се почувствуваат многу брзо. Напредокот на јога- практикантите што редовно го вежбаат Поздравот на сонцето: Сурја намаскар се евидентно забележливи. Тоа значи зголемена позитивна енергија за целото тело, негова живототворна виталност и катадневна флексибилност. Поздравот на сонцето: Сурја намаскар дава сила што постојано го дополнува телото со оптимална енергија, негова совршена координација, функционалност и рамнотежа. Јога-аспирантот стекнува смирен, концентриран ум и се исполнува со ведар дух. Ова не е нарцизам или егоизам, туку вистински и еволутивен развој на свеста.
Поздравот на сонцето ќе овозможи најскапоцениот дар на космичката еволуција: човековото битие да биде во можност отворено, сосема природно и лесно да ја впива живототворната енергија - праната директно од Сонцето. Познато е од дамнина, со векови се пренесува, а секојдевно се потврдува: најблагопријатни се сончевите зраци кога сонцето изгрева или кога тоа заоѓа. Во тие раноутрински или предвечерни часови негативноста на сонцето спрема животот на Земјата е сведен на минимум, а неговите позитивни ефекти максимално се нудат. Ние, вежбајќи го Поздравот на сонцето: Сурја намаскар, максимално се отвораме да ја впиеме праната - живототворната енергија што ги опсипува посветеници на сонцето и јога-практикантите со вечна мудрост за здрав, среќен, креативен и, пред се', со хармонично-доблесен живот.
Со Поздравот на сонцето: Сурја намаскар започнува еден сосема нов и, пред се', позитивен период во нашите животи. Тој го облагородува дотогашното монотоно и тревијално секојдневје. Внесува софистицирана спиритуалност во исушеното духовно катадневие на современиот човек. Со тоа животот добива деликатен вкус на спиритуалност што е неопходен за создавање здрава, креативна и продуктивна личност. Сурја намаскар го осветлува патот по кој милениумски чекореле мудреци и јогини: позитивни и духовно доблесни личности во насока кон светлината на сопственото внатрешно сонце. Искусните практиканти на јогата секогаш и секаде се восхитени од оваа вежба. Таа е идеална за почетници и совршена садана за напредни аспиранти. Се вежба од млада возраст, а претставува во исто време вистинска сладост за стари и доблесни практиканти. Аплицирајќи го Поздравот на сонцето во својата катадневна јога-вежба - садхана создаваме врвно искуство во кое се сладат сите наши сетила, ужива умот и се збогатува духот. Ритамот на креативност зачестува, доблесноста и позитивноста од нас протекуваат како непресушен извор, создавајќи вруток на активен и целосно исполнет живот. Со практикување на Поздравот на сонцето: Сурја намаскар создаваме од себе личности богати со здравје, виталност и духовност и создаваме еден богат свет на среќни, креативни и доблесни лица.
Уверете се во сето ова преку непосредно, лично ангажирање. Затоа, драги мои, дозволете си на себеси едно ново животно и, пред се', позитивно искуство. Вежбајте јога и внесете ја Сурја намаскар: ПОЗДРАВОТ НА СОНЦЕТО во вашето секојдневје! |
