Брисел
Хрватска во ЕУ од 1 јули 2013 година
10.06.2011, 15:48
Европската комисија денеска даде зелено светло за прием на Хрватска во Европската унија од 1 јули 2013 година, изјави во Брисел претседателот на ЕК, Жозе Мануел Баросо.
"Европската комисија реши да му предложи на Советот на министри на ЕУ да бидат затворени и последните четири поглавја од вкупно 35 во преговорите со Хрватска за нејзиното пр��соединување кон Унијата", се вели во изјавата на Баросо.
"Тоа го отвора патот за присоединувањето на Хрватска кон ЕУ од 1 јули 2013 година ако датумот предложен од Комисијата биде потврден од Советот", истакна Баросо и додаде дека "ова е историски ден за Хрватска и за целата Унија".
"Хрватска денеска е подготвена за чекор напред, а тоа е знак и за другите земји од Југоисточна Европа дека ЕУ е конзистентна и реформите си ја прават цената", додаде Баросо.
Шефовите на дипломатиите на 27-те членки на Унијата се повикани од своја страна да го дадат своето одобрение на 21 јуни, неколку дена пред средбата на врвот на европските лидери, соопштија дипломатски извори во Брисел.
Преговорите со Хрватска долго време беа во ќор-сокак поради поглавјето правосудство. ЕУ бараше од Хрватска да одбележи напредок во областа на борбата против корупцијата, потрагата по воените злосторници и соработката со Хашкиот трибунал, како и да изврши реформа во правосудството, што ќе обезбеди независност на судиите.
"Не верував дека Хрватите ќе успеат да го постигнат тоа. Но, за една година тие целосно го реформираа судскиот систем", изјави денеска еврокомесарот за правда, Вивиен Рединг.
Хрватска ги почна преговорите за присоединување кон ЕУ во 2005 година. Хрватска е втора држава од поранешна Југославија што ќе влезе во ЕУ по Словенија, која стана членка на Унијата во 2004 година.
|
