Никулци од грав причина за заразата со ешерихија коли
10.06.2011, 15:25
Никулци од грав одгледувани во Германија се причината за заразата со опасната бактерија ешерихија коли, која уби 29 лица и зарази околу 3.000, изјави претседателот на германскиот Центар за контрола на заразните болести „Роберт Кох“ Рајнхард Бургер.
Тој рече дека иако засега нема позитивни резултати од истражувањата на никулците, одгледувани на фарма во Долна Саксонија, епидемиолошката анализа на моделот на ширење на заразата дава доволно докази за да може да се направи тој заклучок.
Тој појасни дека заклучоците биле направени по истражувањето на патници во автобус, кои се хранеле во еден ист ресторан. Секој патник кој порачал јадење кое соржело никулци, се разболел од крвава дијареа - првиот симптом на заразата со ешерихија коли.
Бактеријата ги напаѓа бубрезите и нервите. И покрај тоа што е откриена во фекални примероци од заразените пациенти, таа се уште не е пронајдена во каква и да било пресна храна.
Бургер исто така истакна дека брзината на ширење на заразата се намалува.
|
