Германци ќе отворат фабрика за 4.000 работници

Груевски вчера најави дека Германците планираат да отворат фабрика од автомобилската индустрија и за таа цел веќе и регистрирале фирма

Премиерот Никола Груевски вчера најави нова германска инвестиција во државава, која ќе овозможи четири илјади нови работни места. Германците планираат да отворат фабрика од автомобилската индустрија и за таа цел веќе и регистрирале фирма.

„Се' уште ја немаат избрано локацијата, но имаат интерна одлука за инвестирање. Таа е од делот на автомобилската индустрија. Според она што ни го кажаа, ќе вработат 4.000 луѓе. Тоа е рекордна бројка. Не знам дали во Македонија има компанија што воопшто, во државна или приватна сопственост, вработува 4.000 луѓе“, изјави вчера Груевски. Според него, компанијата кон крајот на годинава планира да вработи 300 до 400 лица, а во наредните две години ќе ги комплетира 4.000 вработувања. „Каде ќе одберат да инвестираат, локацијата е нивно право. Засега немаме можност да го објавиме нивното име, освен дека се од автомобилската индустрија“, посочи Груевски. Тој најави дека таа е само една од десетте компании кои до крајот на годинава најавуваат свои инвестиции во Македонија. Премиерот најави и отворање на белгиска фабрика во која ќе се произведуваат автобуси.

Според Груевски, новите инвестиции се резултат на претставувањето на Македонија во странство. Турција ја посочи како најзаинтересирана што се докажало при последната промоција на државава. При посетата на шест градови околу 1.700 компании од Турција дошле да слушнат за можностите за инвестирање во Македонија. Некои од нив поединечно се сретнале со македонската делегација и изразиле конкретен интерес за инвестирање.

„Поради тоа стекнавме одредена доверба и кредибилитет кај нив за разлика од минатото пред нашето доаѓање, кога тој кредибилитет беше загубен затоа што најчесто властите уште при првото доаѓање на компаниите за анализа на пазарот ги пречекуваа со сите медиуми и со бомбастични најави дека веќе е договорена работата, а тие дошле само да го анализираат пазарот. Многу сме внимателни во тој дел и тоа ни се исплати затоа што странските компании не' гледаат сериозно и сериозно разговараат со нас без страв дека ќе им ги нарушиме нивните планови“, изјави вчера премиерот. (Ек.Р.)