ЛИЧНОСТ НА ДЕНОТ
Усеин Болт
Тајфунот од Јамајка профучи низ Пекинг! Спринтерот Усеин Болт, несудената ѕвезда во крикет, испиша нова страница во историјата на атлетиката истрчувајќи ја стотката за неверојатни 9,69 секунди, со што за три стотинки го надмина својот светски рекорд што го постави на 31 мај годинава.
Во категоријата на чуда влегува неверојатниот напредок на првиот спринтер од Јамајка, кој доаѓа до олимписко злато. Само пред повеќе од една година, поточно во јули 2007 година во Грција, Болт во своето деби во оваа дисциплина истрча 10,3 сек., за во мај 2008 во Њујорк да стане светски рекордер со 9,72 сек. Тоа беше и единствената трка на 100 м. годинава пред Пекинг за љубителот на регето, кој патеката ја истрча со одврзани врвци на едната златна патика. Забавата е во неговата крв, а така ја сфати и оваа трка, во која последните 20 метри ги истрча со кренати раце, сакајќи да и' каже на конкуренцијата дека е доцна да се обиде да забрза. Колку беше релаксиран говори и тоа што по минувањето низ целта не ни знаеше дека е соборен светскиот рекорд. Сега, пука од оптимизам и е фокусиран на трката на 200 м., каде што целта му е да земе уште еден златен медал, по можност да го собори и рекордот на Мајкл Џонсон, со што ќе стане првиот човек по Карл Луис 1984 година кој врзал победи на 100 и 200 м на Игрите. (Н.К.)
|
