Стихија
Серија пожари изгореа стотици хектари шума
Серија пожари викендов беа забележани во земјава, при што две лица се повредени, а изгореа стотици хектари разновидна шума, трева и нискостеблести растенија.
Во пожарот што во саботата околу пладне избувна во Македонска Каменица, со изгореници од прв степен се здобиле Атанас и Ленка Ѓувалекови, кои веднаш биле пренесени во локалната болница. Поради сериозноста на повредите, Ленка е префрлена во болницата во Кочани, информираат од МВР. Причините за пожарот се' уште се испитуваат.
Речиси истовремено, во атарот на Смоквица, Гевгелиско, настанал пожар, во кој биле зафатена трева и нискостеблести растенија на околу 250 хектари. Пожарот се проширил во должина од 7 километри кон Милетково, при што бил загрозен сообраќајот на магистралниот пат. Полицијата приведе 32-годишен маж поради сомневање дека има врска со избувнувањето на огнената стихија.
Во саботата околу 17,15 часот шумски пожар бил забележан во атарот на селото Баден на планината Огражден, а поради лошите временски прилики, постоела опасност пожарот да се прошири кон границата со Бугарија. По четиричасовна битка со пламените јазици, сточарите и шумарите успеале да го локализираат пожарот.
Околу 30 хектари мешана шума изгореа во атарот на Орманли, Струмичко, а тамошниот Регионален центар за управување со кризи соопшти дека кај местото Стара Смоквица е подметнат пожар.
Била зафатена површина од 10 хектари сува трева и приватни посеви, а теренот е тешко достапен поради опасноста од неексплодирани убојни средства. Лицето кое го подметнало пожарот, е приведено.
Активни пожари се забележани и во Цер, Кичевско, , Слатина, Македонски Брод, Царевиќ и Смолане, Прилепско, Коџа Чаир и Ново Комарево кај Струмица, Стар Дојран... Вчераутро е регистриран пожар и на планината Беласица, меѓу селата Куклиш и Костурино. (Г.А.) |
