Венецискиот фестивал го најави „Четврток“ на Манчевски

Дирекцијата на филмскиот фестивал го објави учеството на Милчо Манчевски во специјалниот проект посветен на 70. јубилеј

Дирекцијата на Филмскиот фестивал во Венеција го објави учеството на Милчо Манч��вски во специјалниот проект посветен на 70. јубилеј на фестивалот. Во чест на јубилејното издание на Фестивалот неговиот директор, Алберто Барбера, упатил ексклузивна покана до режисерите кои влегле во историјата на Фестивалот и во светската кинематографска историја, вклучувајќи го и Манчевски, да изработат кратки филмови на тема „Иднината на кинематографијата“. Изработените филмови меѓу кои е и краткиот филм „Четврток“ на Манчевски ќе бидат прикажани во специјалната селекција „Venezia 70 - Future Reloaded“.

Автор на сценариото на „Четврток“ чие снимање заврши во мај во Њујорк е исто така Манчевски, продуцент е Арон Левин, а во главната улога настапува младата глумица Лора Ласи. Директор на фотографијата е Уна Ли, монтажер Питер Мостерт, а композитор на музиката е Игор Василев-Новоградска.

Во специјалната селекција „Иднината на кинематографијата“ учествуваат најславните имиња на светската кинематографија, покрај Манчевски, со свои филмови се претставуваат и Бернардо Бертолучи, Ким Ки-Дук, Пол Шредер, Абас Киаростами, Валтер Салјес, Монте Хелман, Катарин Бреја, Клер Дени, Атом Егојан, Џејмс Франко, Ермано Олми, Амос Гитај, Жан-Мари Штрауб, Тод Солонц и др.

Милчо Манчевски освои „Златен лав“ за најдобар филм во Венеција во 1994 за филмот „Пред дождот“, кога освои уште девет други награди, а неговиот филм „Прашина“ го отвори Фестивалот во 200 година. На Фестивалот подоцна беше воведена и наградата „Кругот не е тркалезен“ насловена според мотото на „Пред дождот“.