„Боинг“ се судрил со крава

По судирот авионот излетал од пистата и, за среќа, никој од 110-те патници не бил повреден, но бил фатален за заскитаната крава

„Боинг 737-900“ сопственост на превозникот „Лајон ер“ вчера се судри со крава при слетување на аеродромот на островот Сулавеси во Индонезија.

Авионот, кој бил на редовна воздушна линија и полетал од Џакарта, при слетување на аеродромот Џалалудин во вторникот вечерта погоди една од трите крави кои слободно шетале по пистата.

По судирот авионот излетал од пистата и, за среќа, никој од 110-те патници не бил повреден. Судирот, сепак, бил фатален за заскитаната крава.

Пилотот на авионот изјави за локалните медиуми дека кога го здогледал животното на пистата помислил дека е поголемо куче.

Неколку летови беа откажани поради инцидентот, а аеродромот бил привремено затворен.

Официјални лица, како што пренесува Си-Ен-Ен за „Џакарта пост“, го потврдиле инцидентот и истакнале дека аеродромот немал соодветна заштитна ограда.

Индонезија се соочува со сложена организација за да обезбеди воздушен сообраќај до сите свои 17.000острови, но за оваа голема земја се наведува дека има „најлоша безбедност во летањето“ во Азија.

Во април годинава авион на „Лајон Ер“ ја промаши пистата при слетувањето при што 22 лица беа полесно и потешко повредени.