Одбележана 12-годишнината од Карпалак

И оваа година беше побарано покрај плочата со имињата на загинатите да постави спомен обележје

Со полагање цвеќе и панихида денеска пред спомен-плочата беше одбележана 12-годишнината од загинувањето на 10-те припадници на АРМ од Прилеп во месноста Карпалак на автопатот Тетово - Скопје.

Панихидата ја отслужија двајца свештеници на тетовското архиерејско намесништво на МПЦ- ОА, а на одбележувањето присуствуваа министрите за транспорт и врски Миле Јанакиески и за здравство Никола Тодоров, заменик министерот за одбрана Емил Димитриев, делегација од Кабинетот на претседателот на Република Македонија, Генералштабот на АРМ, роднини, пријатели и сограѓани на загинатите од Прилеп, како и претставници на политички партии, здруженија на бранители од Прилеп, Куманово, Скопје и Тетово.

Дел од семејствата на загинатите бранители побараа државата покрај плочата со имињата на загинатите да постави спомен обележје на ова место како своевиден знак за благодарност кон тие што загинале во нејзино име.

Претставниците на здруженијата на бранители уште еднаш побараа сите тие да се здружат под едно централно здружение со што полесно би ги оствариле правата на своите членови и нивните семејства.

- Државата помогна што можеше да помогне, но животите на овие малди луѓе нема да се вратат, рече Пецо Петрески, брат на загинатиот бранител Марко Деспотоски. Вецо Секулоски, брат на Пецо Секуловски рече дека остануваат на барањето што поскоро во Карпалак да биде подигнат споменик на загинатите бранители од Прилепско.

Според возачот на автобусот кој бил дел од нападнатиот армиски конвој Ацо Јованоски Реган, жално е што и по толку време не е пронајдено решение за соодветно одбележување на местото од загинувањето на десетте прилепски резервисти со споменик наместо со спомен плоча со нивните имиња.

- Денеска по 12-ти пат се среќаваме на ова место и морам да повторам - обичен камен да се постави за да запалиме свеќа и да ги оставиме цвеќињата наместо тоа да го правиме на банкината. Преживеаните од Карпалак и семејствата на загинатите го чествуваат овој ден, но болката останува, изјави Андоновски.

Претставникот на здружението „Прилепски бранители“, Зоран Талески го поддржа барањето за поставување спомен обележје на ова место.

- Дојдовме да се поклониме на местото каде загинаа нашите соборци, сограѓани и пријатели. Ние од ова здружение имаме една желнба, а тоа е сите бранители да бидеме во едно здружение за да бидеме посилни со што ќе поставиме споменик на Карпалак, а и ние полесно ќе ги оствариме своите права, рече Талески.

На 8 август 2001 година армиски конвој составен од пет возила и 120 резервисти наиде на заседа кај месноста Карпалак. Во одбрана на независноста, територијалниот интегритет и суверенитет на државата загинаа Нане Наумоски, Сашо Китаноски, Бранко Секулоски, Горан Миноски, Марко Деспотоски, Ердован Шабаноски, Љубе Грујоски, Дарко Вељаноски, Веби Рушидоски и Пеце Секулоски, сите од резервниот состав на АРМ од гарнизонот Прилеп.