Почна посетата на Самарас на САД

Грчкиот премиер Андонис Самарас вчера ја почна посетата на СAД, и тоа според информациите на грчките новинари во САД, од Вашингтон. Самарас пристигна во хотел во непосредна близина на Белата куќа, без да даде изјава за малубројните грчки новинари, или да одржи средби за кои би била информирана јавноста. Се очекува денес да отпатува во Њујорк, каде ќе го помине најголемиот дел од посетата на САД и каде ќе има средби со грчката бизнис заедница.

Во четврток, Самарас ќе се врати во Вашингтон, првин на пладневна средба со државниот секретар Џон Кери, за потоа рано попладне да се сретне и со претседателот Барак Обама во Белата куќа. Најавено е дека на агендата ќе биде само средба, без ручек во чест на грчкиот гостин, додека за медиумите се предвидени куси изјави без можност да се поставуваат прашања, што значи дека би отпаднала заедничката прес конференција во познатата Градина на розите. Според грчките медиуми во САД, информирани од амбасадата на Грција, Самарас ќе се обиде надворешно-политичките прашања како статусот на Кипар и спорот за името со Македонија да ги расправа на ручекот со Кери. Ова со цел да може на средбата со Обама да се фокусира на прашањата кои се од негов интерес – продолжувањето на американската поддршка за натамошното финансирање на грчкиот буџет преку Меѓународниот монетарен фонд и барање да се ублажат условите со кои Грција е соочена, пред се отпуштањето на илјадниците вработени во државната администрација.

Самарас во Вашингтон ќе се сретне и со уредничкиот колегиум на весникот „Вашингтон пост“, по што ќе се врати во Њујорк, каде во петокот треба да се сретне со генералниот секретар на Обединетите нации Бан Ки-мун. Засега нема потврда дали на оваа средба ќе присуствува и посредникот во спорот за името амбасадорот Метју Нимиц, но се очекува спорот за името да биде една од главните теми. Македонија отворено побара интензивирање на средбите, како на посредниците, така и отворање на можноста за директни средби на високо ниво и формирање на тимови предводени од двајцата премиери кои под посредство на Нимиц интензивно би разговарале за спорот. Самарас овој предлог го одби. Грчките коментатори во САД, особено блиските на Демократската партија, се надеваат дека Самарас ќе добие поддршка од Обама по прашањето на спорот за името.

- Во споредба со односите со Белата куќа на Буш, има една значајна промена на тонот, а тоа е дека администрацијата на Обама ја поддржува позицијата на Атина за тоа дека поранешната југословенска Република Македонија не може да влезе во НАТО без решение на спорот за името. Секретарот Кери агресивно турка за постигнување на мир на Блискиот Исток, а во неговиот Стејт департмент гледаат прозорец за обединување на Кипар. Можеби би сакал да помогне да се реши уште едно одамна отворено прашање на името на Македонија, пишува Енди Земенидес, директор на Хеленскиот американски лидерски совет, грчка организација која го поддржува Обама.

Како и Македонија, и Турција бара интензивирање на разговорите за статусот на островот Кипар, нешто што кипарските Грци го одбиваат. Се очекува за време на средбите во Вашингтон, американските власти да побараат информации од Самарас како Грција ќе се постави во првата половина на 2014 година, кога ќе претседава со Европската Унија, по балканските интеграции, но и по прашањето на вклучувањето на Турција во амбициозниот проект за создавање на слободна трговска зона меѓу САД и ЕУ, нешто за што турските власти се особено заинтересирани иако не се членка на ЕУ поради блокадите на Кипар и поголемите европски држави.

Самарас во Вашингтон доаѓа непосредно по средба со идниот албански премиер Еди Рама, со кого разговараа за статусот на морската граница меѓу двете држави. Се очекува дека Самарас во Вашингтон ќе го претстави реткиот најавен инвестициски успех, градењето на гасовод за азербејџанскиот гас од Турција, преку Грција и Албанија, под Јадранско Море, до Италија. Проектот ТАП, сепак се комплицира поради неможноста на Грција да постигне договор со Албанија за прашањето на нивната граница.