Намалени цени и повеќе пари за лекови

Фондот за здравствено осигурување на аптеките им даде околу 140.000 евра повеќе пари, а 12 лека ги извади од квотите на аптеките, што значи дека аптеките ќе мора да ги имаат во секој момент кога ќе побара пациент. Меѓу нив е лекот за трансплантација на бубрези „целцепт“, како и лекови за други специфични и ретки болести. На овој лек и на други седум лека Фондот им ги намали референтните цени. Така, цената на „целцептот“ што ја признава Фондот, од 9.000 денари е намалена на 1.700 денари. Со новите 12 лека, од октомври во аптеките ќе има 39 лека за кои аптеката ќе нема ограничување да го набави, а на пациентот да му ги издаде во секој момент. Процесот на ослободување на лековите од квоти е во пет фази и ќе заврши во 2015 година.

Од август, пак, аптеките ќе може да набавуваат лекови со сини картони во вредност од 2,74 милиони евра или 168,5 милиони денари, што е за 140.000 евра повеќе. Зголемувањето на квотите се должи на прераспределувањето на неискоритените средства од претходниот период. Редистрибуција на средствата е направена на вкупно 724 аптеки со кои Фондот има активен договор. Од нив, кај 295 аптеки квотата е зголемена за 20 отсто, а кај 181 аптека е намалена од 10 до 40 отсто, зависно од нивната реализација. (Ј.Ј.)