Италијанските виртуози Енрико Диндо и Моника Катароски за крај на годинешново „Охридско лето“

На вечерашниот концерт што ќе се одржи во катедралната црква „Света Софија“ од 21 часот ќе бидат изведувани познати дела на Шуберт, Капустин и Шостакович

Со вечерашниот концерт на италијанските уметници Енрико Диндо на виолончело и Моника Катароски на пијано ќе биде спуштена завесата на 52. издание на Фестивалот „Охридско лето“, најголемата музичко–сценска манифестација во земјата.

Изминатите 40 дена на сцените на Антички, Света Софија, предворјето на Света Софија, Центарот за култура „Григор Прличев“, но и кај Заливот на Коските, продефилираа бројни познати имиња од домашната и светската музичка и драмска сцена, целовечерни концерти за паметење со ексклузивни гости и уметници.

Печат на ова 52. фестивалско издание ќе остават настапите на Мишел Камино, Пол Мејер, „2ЦЕЛЛОС“, Перпетум Џезиле“, „Леб и Сол“, и дел од деветте театарски претстави што беа на програмата на „Охридско лето“, од кои дури пет беа премиерни изведби.

Богатата фестивалската програма само го потврдува епитетот што го носи „Охридско лето“ како најзначајна културна манифестацијата во Македонија, која преку своето долгогодишно опстојување и квалитет се врежа во светската мапа на културни манифестации.

Енрико Диндо, кој ја има честа да ја заокружи фестивалската возбуда наречена „Охридско лето“ е истакнат италијански мајстор на виолончело. Кога во 1997 година ја освои Првата награда на натпреварот „Ростропович“ во Париз, големиот Маестро за него напиша: „Диндо е виолончелист со исклучителни квалитети, комплетен уметник и формиран музичар, со извонреден звук што се протега како најпрекрасниот италијански глас“. Оттогаш, Диндо започнува активна концертна кариера, настапувајќи во многу земји со престижни оркестри како Националниот оркестар на Франција, Санкт Петербуршката филхармонија, Чикаго Симфони Оркестра, Торонто Симфони Оркестра, Националниот оркестар на Сао Пауло, Филармоника дела Скала и други, под диригентската палка на Валери Гергиев, Рикардо Мути, Мстислав Ростропович, Даниеле Гати, Пааво Јарвј.

Бил гостин на повеќе светски фестивали. Добитник е на наградата „Абиатти” за најдобар солист во сезоната 1998/1999 од страна на Асоцијацијата на музички критичари на Италија. Во 2004 година, тој беше прогласен за севкупен победник на Шестиот меѓународен натпревар Веб Хол Компетишн, а во 2005 година Претседателот на Италија му ја додели наградата „Витторио Де Сика” за исклучителни остварувања на полето на музиката.

На Диндо му се посветени повеќе дела од истакнати автори. Остварува снимки за Дека, а свири на Пиетро Џиакомо Рогери виолончело од 1717 година.

Моника Катароси е лауреат на значајни меѓународни натпревари. Како камерен музичар остварува богата кариера, соработувајќи со Џулиус Бергер, Роко Филипини, Дора Шварцберг, а е редовен концертен партнер на Енрико Диндо.

Катароси е официјален корепетитор на натпреварот по виолина и виолончело во Маркнојкирхен и на натпреварот Јанигро во Загреб (на двата натпревари беше наградена со признание за исклучителна корепетиција), а со години е и пијано придружник на Интернационалниот натпревар по виолина „Леополд Моцарт“. Освен тоа, таа е корепетитор на Академијата во Кремона, Пинерола и на Летната академија при Моцартеум универзитетот во Салцбург.

На вечерашниот концерт што ќе се одржи во катедралната црква „Света Софија“ од 21 часот ќе бидат изведувани познати дела на Шуберт, Капустин и Шостакович.