Депонијата недоисчистена, Тетово полно со ѓубре

Тетово - Дивата депонија во Тетово останува недоисчистена. Дали поради деновите на викендот или празнувањето на големиот исламски празник Рамазан-Бајрам, а можеби нешто трето, градот продолжува да се труе од чадот и другата смрдеа што се шири од депонијата. Имаше и рокови - „до понеделник е крајниот рок“. Овој термин помина.

Од ангажираното претпријатие „Голец транс“ од Желино велат дека делот од кој чади, нема да се изнесува, бидејќи претставува опасност за возилата што би го транспортирале. ЈКП „Тетово“ не успеа да ги елиминира жариштата од кои излегува чад.

Сега дополнителен проблем е ѓубрето низ градот. На делови околу градското пазариште не може ниту пешки да се мине по асфалт поради расфрлан најразличен смет. Има и многу други места низ Тетово од каде што не е собрано ѓубрето. Се' како да е оставено на стихијата. Овие неколку изминати денови по улиците не се гледаат ниту ангажираните волонтери кои требаше да придонесат во чистењето.

На 120 вработени во „Комунална хигиена“ во петокот им е исплатена по една плата. Втората, поради која комуналните работници штрајкуваа, ќе им биде исплатена овие денови. Така вети градоначалникот Сади Беџети. Дали со тоа ќе прекине штрајкот не е познато, бидејќи штрајкувачите имаа уште едно барање: од нивното претпријатие да замине директорот Ајет Мурати. Нема информации дека првиот комуналец поднел оставка.

Тетовци го изгубија трпението со депонијата и сметот. Велат дека редовно ги намируваат сметките за комунални услуги и бараат достоинствен изглед на градот.(Г.Е.)