19.08.2012, 15:39 Aсанж му се заблагодари на народот на Еквадор
Познатиот шпански адвокат Балтазар Гарзон, кој важи за експерт за човекови права, изјави денеска дека Џулијан Асанж „им е благодарен на народот на Еквадор и на нивниот претседател Рафаел Кореа за поддршката“ во неговиот случај.
Во изјавата што Гарзон ја даде пред зградата на еквадорската амбасада во Лондон, каде основачот на Викиликс побегна за да не биде екстрадиран во Шведска, каде е осомничен за силување, рече дека Асанж „секогаш се борел за правда“. Гарзон од минатиот месец е раководител на правниот тим на Асанж и на Викиликс и тој има овластување да се грижи за заштитата на нивните права. Според Гарзон, секој насилен упад на британската полиција во зградата на амбасадата за да се уапси Асанж би бил „тешка повреда на меѓународното право“.
Шпанскиот адвокат стана познат во светот пред петанесетина години кога подигна меѓународна потерница против поранешниот чилеански диктатор Августо Пиноче, кој тогаш се наоѓаше на лекување во Лондон, предизвикувајќи проблеми за тогашната лабуристичка влада на Тони Бер.
Изјавата на шпанскиот адвокат, со предупредување до Британците е наполно идентична со синоќешната изјава на еквадорскиот претседател Рафаел Кореа кој, исто така, ја предупреди Велика Британија на „тешките последици“ што може да настанат, доколку Асанж биде насилно одведен од амбасадата за да биде екстрадиран.
Претставници на опозицијата во Кито изјавија денеска за „Меил он сандеј“ дека Еквадор не е земјата во која Џулијан Асанж треба да бара засолниште, затоа што таа е спротивна на сите принципи што Асанж и неговиот Викиликс јавно ги застапуваат и ги бранат. Еквадорските опозиционери тврдат дека целата работа околу давањето азил на Асанж е дел од предизборната кампања на левичарскиот претседател Рафаел Кореа кој сака уште еден седумгодишен мандат.
Според опозицијата, земјата се гуши во корупција, демократијата е сериозно задушена, а властите апсат новинари и активисти кои ја критикуваат власта. Од доаѓањето на Кореа на власт забранета е работата на шест независни телевизиски станици и на 12 весници, само затоа што го критикуваа претседателот. Новинарите од оваа земја бегаат во странство, барајќи азил, а овде никој не доаѓа за да ги ужива човековите слободи, изјавуваат претставници на опозицијата во Еквадор за „Меил он Сандеј“.
|
