19.08.2012, 14:08 Шојбле: Нема дополнителна финансиска помош за Грција
Германија е против дополнителна финансиска помош за Грција, изјави германскиот министер за финансии Волфганг Шојбле.
- Можностите на ЕУ за обезбедување финансиска помош на Грција не се безгранични. Неодговорно е да се ??фрлаат пари во бездна, истакна министерот, дополнувајќи дека нема простор за развивање нова програма за спасување на Грција.
Ставот на Германија го потврдува и весникот „Велт ам зонтаг“, кој пишува дека официјален Берлин и Париз имаат различни ставови околу финансиската помош за Грција.
Во своето денешно издание, весникот, повикувајќи се на европски извори, наведува дека германската Влада одбива трет спасувачки план за Атина, како и тоа да и се даде дополнително време на Грција за да заздрави финансиски, со аргумент дека повеќе време значи повеќе пари.
Во средата портпаролот на германскиот канцелар Ангела Меркел изјави дека таа се придржува кон важечкиот договор за обврските на Грција, според кој, Атина има рок до 2014 година да ги заздрави финансиите и да изврши структурни реформи, кои Грција ги вети во замена за финансиска помош.
Според извор на весникот овој став го застапуваат и други европски земји како Финска, Естонија и Словачка.
На спротивна позиција се Франција и некои јужни европски земји, кои се подготвени да дадат нова помош на Грција, со цел да се избегне нејзино излегување од еврозоната.
Весникот „Фајненшл тајмс“ во средата објави дека Грција ќе бара пролонгирање на планот за строги буџетски мерки и продолжување на рокот на неговата имплементација за две години, до 2016 година.
Германскиот весник „Шпигел“ денеска пишува дека во следните две години Грција ќе мора да заштеди до 14 милијарди евра наместо досега проектираните 11,5 милијарди евра.
|
