„Аман“ најавува нови протести во Тетово, Куманово и Прилеп

Граѓанската иницијатива „Аман“ која се противи на поскапувањата на струјата, парното и горивата, ќе почне со нов бран протести низ Македонија

Граѓанската иницијатива „Аман“ која се противи на поскапувањата на струјата, парното и горивата, денеска најави нови протести низ Македонија.

- Добредојдени се сите граѓани, без разлика на верска, национална или политичка припадност. Само сите заедно можеме да успееме да се избориме за тоа што го бараме. Минатиот вторник имаше протести во Скопје и Битола, а за утре се планираат протести во три нови града - Тетово, Куманово и Прилеп. Протестот во Скопје е предвиден да почне утре, во 18 часот, пред Портата „Македонија“, изјави Христијан Узунов од Граѓанската иницијатива „Аман“ на прес конференцијата одржана пред седиштето на Регулаторната комисија за енергетика.

Од Граѓанската иницијатива „Аман“ бараат да се укине ставката ангажирана моќност од 33 отсто, да се врати евтината дневна тарифа на струјата, да се врати цената на струјата и на парното од 2008 година, да се запре со приватизација или докапитализација на целиот енергетски сектор кој е во сопственост на Република Македонија, да се инвестира во одржливи извори на енергија (соларна, геотермална, на ветер), да се повлече новиот правилник на АД Топлификација и да се намалат цените на горивата во согласност со стандардот на народот.

Претставниците од „Аман“ информираат дека досега никој не ги повикал и не побарал да се сретне со нив.