Грчките црвени линии - црвен картон

Наумовски тврди дека Грција ги плаќа предлозите од странство за промена на името на Македонија

Шефот на дипломатијата, Антонио Милошоски, се надоврза на кавгата со Грција, изјавувајќи вчера од САД дека Атина место да се посвети на тоа како да се доближат позициите, троши време, енергија и дипломатија на тоа кој да биде обвинет за немањето решение.

„Грчката дипломатија многу повеќе е фокусирана на бламирање отколку на содржинско поместување во позицијата, со фразите и реториката за црвени линии кои се црвен картон за каков било компромис“, изјави Милошоски. Тој смета дека спорот нема да биде решен се' додека вниманието не се пренасочи од тоа кој е виновен затоа што нема решение – на самото решавање.

На Трансатлантската вечера во Њујорк за сите земји-членки на НАТО и на ЕУ, тој апелирал на поголемо внимание од американската администрација и од европски земји, бидејќи Македонија е мала и самата со своите потенцијали не може да ја убеди Грција во прагматично однесување околу одреден компромис.

Од Скопје, пак, вицепремиерот Васко Наумовски предупреди дека во изминатите петнаесетина години имало многу предлози и сугестии, чија цел била да ја принудат Македонија да прифати некакво решение и дека најголем дел од нив се политички и финансиски поддржани од Грција.

„Тоа е показател дека другата страна не смее да се потцени и дека има значителни ресурси кои можат да се употребат за Македонија да биде принудена да прифати нешто што не е во нејзина корист“, беше коментарот на Наумовски на предлозите на Центарот за стратегиски и меѓународни студии од САД деновиве.

Овој тинк-тенк сугерира Македонија да прифати додавка „Северна“ или „Вардарска“ за името кое би се користело во сите меѓународни организации и во билатералните односи. Грција, пак, за возврат би прифатила именување на националниот идентитет и јазик како „славомакедонски“. Изготвувањето на оваа анализа било спонзорирано од Лаврентис Лаврентијадис, грчки банкар и медиумски магнат. (Н.Р.)