Карла Бруни

Носејќи панталони прекршува закон

Панталоните и оваа година се хит во женската гардероба на Модната недела во Париз, но модно свесната жена, како што е Карла Бруни, но и многубројните туристи, не знаат дека со носењето пантолони во Франција го прекршуваат законот стар 200 години. Полицијата тогаш издала наредба со која им се забранува на жените да носат панталони и таа наредба никогаш не ни била повлечена - се вели во новата книга на Кристин Бард, која се занимава со историјата на овој специфичен начин на облекување. Ова би значело дека оваа недела првата дама на Франција, Карла Бруни, го прекрши правилото на својата земја, поради тоа што странските претставници во Елисејската палата ги поздрави во панталони.

„Со наредба на полициското заповедништво, во 1800 година на жените им е забрането да носат панталони, освен ако немале посебно одобрување. Ова правило никогаш не беше поништено, што значи дека се' уште е во сила“, објаснува историчарката Кристин Бард, која напишала книга „Политичката историја на панталоните“. Таа додава дека женското носење панталони било социјално табу и дека правото да се носат панталони е резултат на борба во кој се рефлектира половиот сооднос. „Панталоните не се само симбол на машката моќ, но, исто така, и на сепарација на половите. Жена која носела панталони можела да биде обвинета за трансвестија“, објаснува историчарката . „Оваа жена била закана за природниот ред за нештата, како и социјалниот, моралниот и политичкиот поредок“. Во книгата се оддава почит на Марлен Дитрих, која носела панталони во 1933 година, но на модната писта не се облекувале се' до 60-тите години на минатиот век. Носењето панталони масовно се прошири во 1970 година благодарение на борбата за женските права за фармерки и за спортска облека во САД. А големо влијание имаше и Ив Сен Лорен, кој сонуваше за жените да креира еднаков еквивалент на машката гардероба. Но, историчарката вели дека денес е еднакво важно и правото на неносење панталони. Она што е најважно е слободниот избор на гардероба.