„Мајки“ на Манчевски на Берлинале

Филмот „Мајки“ на Милчо Манчевски влезе во престижната програма „Панорама“ на претстојниот 61. Берлински филмски фестивал, кој ќе се одржи од 10 до 20 февруари 2011 година.

По Венеција, ова е вториот од трите најголеми европски, но и светски филмски фестивали, на кој ќе учествува Манчевски со свој филм. „Пред дождот“ и „Прашина“ беа во главната програма во Венеција, а четвртиот негов игран филм „Мајки“ ќе биде презентиран во втората по значење програма на Берлинскиот филмски фестивал. Програмата „Панорама“ има голем рејтинг и се смета за програма која многу смело открива нови визии и која се наоѓа веднаш до главната, носејќи понекогаш и многу попровокативни наслови.

„Мајки“ ја имаше својата светска премиера во Торонто, а на 16 октомври ќе го отвори 31. Интернационален фестивал на филмската камера. Годинава „Мајки“ е македонски каднидат за номинација за „Оскар“ за странски филм, и наедно трет филм на Манчевски кој влегува во оваа трка бранејќи ги боите на Македонија. (С.У.)