Лустраторите одлучија: Ивановски бил кодош

Претседателот на Уставен суд има рок од 8 дена да поднесе жалба до Управниот суд, а Комисијата за лустрација ќе мора да ја чека конечната одлука

Светлана Унковска

Претседателот на Уставен суд, Трендафил Ивановски, вчера во својата канцеларија го очекуваше конечното решение на Комисијата за лустрација, која едногласно го потврди заклучокот дека првиот човек на највисоката судска инстанца соработувал со тајните служби. Ивановски не сакаше да ја коментира одлуката на Комисијата, но за денеска најави дека на прес-конференција ќе се произнесе за ваквото решение, како и тоа што натаму ќе преземе.

Претседателот на Комисијата за лустрација, Томе Аџиев, по вчерашната седница ја соопшти одлуката дека изјавата на уставниот судија не одговара со фактите и документите што тие ги поседуваат и со тоа е донесена првата одлука дека судијата Ивановски е кодош.

„Имавме редовна седница на која донесовме решение дека ние и натаму остануваме на заклучокот оти подносителот на изјавата не ги исполнува условите за вршење јавна функција и ние ќе му го доставиме ова решение“, изјави Аџиев.

За дилемите во јавноста дали Комисијата за лустрација со системот на надгласување носи кредибилни одлуки кога се работи за факти, тој вели дека тие се носат со мнозинство гласови, како што е утврдено со законот. Во донесувањето на заклучокот за уставниот, тој рече дека не биле земени во предвид изјавата и изнесените аргументи со кои Ивановски на отворената седница во понеделникот се бранеше и ги отфрлаше обвинувањата дека бил кодош.

„Ние го сослушавме, но не сме должни да ги оценуваме неговите изјави. Ние ги оценуваме податоците, односно документите со кои располагаме, а што ни беа доставени од органите. Неговата изјава е дали тој се согласува со нашиот заклучок или не се согласува, а тој кажа дека не се согласува“, рече Аџиев. Претседателот на Уставен суд има рок од 8 дена да поднесе жалба до Управниот суд, поради што Комисијата за лустрација ќе мора да ја чека конечната одлука.

Но, се чини дека за Ивановски одлуката на лустраторите е очекувана, бидејќи тој уште во понеделникот најави дека ќе поднесе жалба до Управен суд, а потоа ако треба и до Врховен суд. Процесот го нарече битка на Давид и Голијат на „вешто исконструирани атак и хајка, политичка пресметка и обид за дискредитација на носител на раководна функција во институција што не постапува по политички диктат“. Во постапката за жалба сега станува нејасно и по кој закон ќе се води, дали по Законот за лустрација или по Законот за управна постапка. Одредбите што го предвидуваат правото на жалба по одредена одлука во овие два закона се во колизија, бидејќи Законот за лустрација одредува дека конечната одлука ја донесува Управниот суд, но по решенијата од овој суд според Законот за управна постапка конечна одлука донесува Врховниот суд.

За обвинувањата на дел од политичките партии дека одлуките се резултат на политички пазар претседателот на Комисијата Аџиев, вчера рече дека тие не подлегнувале на политички притисоци. Тој информираше дека досега не утврдиле некој од 120 пратениците дека е кодош, но за еден од нив се' уште трае постапката на разгледување на документацијата.

За пратеникот Борис Стојменов повторија дека немаат никакви документи со кои би се докажало дека тој соработувал со тајни служби. За него, најгласни во обвинувањата беа од партијата на Љупчо Георгиевски, ВМРО-НП. Од оваа партија вчера рекоа дека ќе чекаат Комисијата да ги каже имињата на двајцата пратеници „за кои во Комисијата се надгласувале“ алудирајќи дека едниот од нив е Стојменов. Дури потоа ќе можеле да го разгледаат неговиот предлог за можен дуел со Љупчо Георгиевски. Во партијата знаат дека според актуелниот закон, имињата на кодошите не смеат да се објавуваат, но рекоа дека ќе поддржат измени во тој дел.