Бојо Андревски судски ќе ги преземе „Време“ и „Шпиц“
Бојо Андрески, издавачот на „Вечер“ и сопственик на Европскиот универзитет, му објави војна на Велија Рамковски, најавувајќи дека наскоро преку извршител ќе ги преземе весниците „Време“ и „Шпиц“ како наплата на долгот од над 200 илјади евра. Постапката за одземањето на сопственоста на весниците е започната преку извршител и доколку во најскоро време фирмите на Рамковски „Синим“ и „Време еч“ не ги исплатат долговите за печатењето на двата весника на „Цетис принт“, или не се предложи спогодбен договор, весниците „Време“ и „Шпиц“ со извршна постапка ќе преминат во сопственост на Андрески.
Според адвокатот Стево Меноски, правен застапник на групацијата „Андревски“, против Рамковски и сосопствениците на неговите фирми поднесени се и кривични пријави за обид за измама.
Откако по двегодишно печатење на двата весника, во 2005 и 2006 година, не била платена ниту една фактура, „Цетис принт“ поднела тужба за што Основниот суд Скопје 2 во мај годинава донел пресуда фирмите на Рамковски „Синим“ и „Време еч“ да си го платат долгот. Во тоа време „Цетис принт“ одби да ги печати весниците се' додека не биде исплатен долгот, поради што и „Време“ и „Шпиц“ извесен период се печатеа во Бугарија. Според адвокатот Меноски, договорите околу печатењето на весниците ги правел лично Рамковски, но кога било побарано од него да го плати долгот, тој печатењето на весниците го префрлил на друг издавач, за да избегне да ги плати побарувањата.
За да ги избегне плаќањето на долгот според пресудата, вели Миновски, жиро-сметките на овие две фирми остануваат подолго време блокирани, иако весниците и натаму непречено излегуваа. Во меѓувреме, додава тој, Рамковски печатењето на весниците го префрла во својата печатница „Мисирков“ и отвора нова фирма „Плус продукција“ која продолжува со издавањето на двата весника. Поради ова, против Рамковски и сосопствениците на неговите фирми е поднесена и кривична пријава за измама.
„Сметаме дека Одделението за организиран криминал при Јавното обвинителство има доволно докази да поведе кривична постапка. А, со оглед дека не постои друг имот на фирмите кои се должници, своите побарувања ќе бидат наплатени со преземање на дневните весници ’Време’ и ’Шпиц‘“, потврди адвокатот Стево Меноски, кој смета дека на друг начин и не ќе може да биде наплатен долгот. Тој рече дека по преземањето на овие два весника, за нивната судбина ќе одлучува Андрески, но смета дека најверојатно тие нема да ги згаснат и ќе продолжат да бидат присутни на медиумскиот простор. Околу процената на весниците, Меноски рече дека веќе се направени пресметки и дека нивното преземање би требало да ги искомпензира долговите во целост. (Св.У.) |
