Доматите се газеа, сега ги нема ниту за лек
Големата побарувачка на доматите услови раст на цените
Александрија Стевковска
Трговците се најдоа во мртва трка за откуп на домати, бидејќи на пазарот во услови на зголемена побарувачка буквално снема домати за продажба. И додека пред неколку дена, соочени со проблемот на пласман, земјоделците ги фрлаа и газеа доматите за да го покажат револтот од откупните цени и долгиот рок од 90 дена за исплата на предаденото производство, сега молчат. Големата побарувачка на домати создава услови за раст на цените.
„Нормално дека во услови на зголемена побарувачка расте и цената на доматите, што пак овозможува прилив на средства кај производителите за покривање на нивните производствени трошоци. Претходните цени од 4,5 до 5 денари за килограм беа премногу ниски, што предизвика револт кај земјоделците, истурање и газење на доматите по улиците“, вели претседателот на Федерацијата на фармерите, Ѓоко Данаилов.
Според него, големата побарувачка довела до недостиг од домати, но набрзо ќе се реши тоа, односно се очекува деновиве да се пласира новото производство кое би требало да ги задоволи потребите на откупувачите.
Зголемената побарувачка и растот на откупната цена на доматите го потврдува и Министерството за земјоделство.
„По остварените интензивни контакти со министерствата од регионот и со домашните конзервни фабрики, се јави голема заинтересираност на трговците за струмичкиот домат. Според согледувањата, стабилизиран е откупот, особено по зголемениот извоз во Бугарија, Грција, Романија и во други земји. Цените бележат зголемување, а останува отворена и можноста за откуп во преработувачки капацитети кои дневно откупуваат од 30 до 50 тони. Трговците го информираа Министерството дека сега нема доволна понуда на домати и дека тие не биле во можност да ги откупат потребните количества за извоз“, информираат во Министерството за земјоделство.
Проблемот со откуп на домати се јави пред околу три недели, кога немаше никаков пласман на производството на домати. Проблем беше тоа што немаше никаква побарувачка, поради што доматите беа фрлани и газени. По пројавениот интерес на откупувачите за преземење на понудените количини на производството, земјоделците беа незадоволни од цената од 5 денари за килограм, но многу повеќе реагираа на рокот за исплата на откупените домати. Имено, производителите на домати беа незадоволни и од рокот од 90 дена што им бил ветен за исплата на откупените количини и тие бараа парите да ги добијат во рок од 3 до 4 дена од откупот. Струмичките земјоделци, исто така, бараа да ги предадат есенските домати под пластеници на конзервно-преработувачките капацитети, но под услов откупот да биде во Струмичкиот регион, а не во конзервните фабрики во Гевгелија и во Свети Николе, бидејќи тоа ги оптоваруваше со транспортни трошоци. По контактите што се остварија со трговците во регионот, македонските домати „отпатуваа“ надвор од земјава, а преработувачките капацитети останаа без суровина и без производство. |
