Личност на денот
Асиф Али Зардари
Зардари двапати беше министер во владите на својата сопруга
„Господинот 10 проценти“ стана новиот претседател на Пакистан, најмногу благодарение на убиството на неговата сопруга Беназир Буто. Асиф Али Зардари, поранешен плејбој и еден од најконтроверзните пакистански политичари, целосно ја презеде улогата на својата сопруга, без која тешко ќе можеше да замисли дека ќе седне во испразнетата претседателска фотелја. Зардари двапати беше министер во владите на својата сопруга во осумдесеттите и деведесеттите години на минатиот век, а поради корупција (така го доби прекарот „Господин 10 проценти“) и поврзаност со убиството на братот на Буто - политички ривал и голем критичар на Беназир, одлежа повеќе години во затвор. Во таен договор со својот претходник, генералот Первез Мушараф, обвиненијата против него и неговата сопруга беа повлечени минатата година.
Зардари (53), денес лидер на нуклеарната сила Пакистан, своето претседателствување пред една недела го започна со обвинување од поранешниот премиер на земјата Наваз Шариф дека го прекршил предизборниот договор со неговата партија. Сожалувањето и еуфоријата по смртта на Беназир го искачија Зардари до врвот, иако неговото враќање на политичката сцена за многумина е стравување од враќање на стариот стил на политика полна со скандали. (Т.Г.)
|
