Претходен број

ЕУ порачува: Не барајте вина надвор за домашни проблеми

Фуере вчера порача дека е премногу рано да се шпекулира за содржината на извештајот на ЕК

Тамара Грнчароска

Евроамбасадорот Ерван Фуере вчера без заобиколување им кажа на македонските политичари дека не направиле многу во поглед на евроинтегрирањето на Македонија и оти неуспехот есенва да се добие препорака од Европската комисија за датум за старт на преговори со ЕУ не ќе може да се оправдува со надворешни проблеми т.е. спорот со Грција.

Катастрофалните избори, непостоење политички дијалог и бојкотот на Собранието беа во фокусот на критиките на Фуере како неисполнети обврски од страна на Македонија, во неговото обраќање пред собраниската Комисија за европски прашања, во рамките на презентирањето на приоритетите на француското претседавање со ЕУ од страна на францускиот амбасадор во земјава, Бернар Валеро, во присуство на вицеперемиерот задолжен за европски прашања, Ивица Боцевски.

„Изборите беа лоши од аспект на стандардите и ние очекуваме повеќе од земја-кандидат“, рече Фуере, нагласувајќи дека земјава ќе мора целосно да ги имплементира препораките на ОДИХР за следните избори. За политичкиот дијалог Фуере е на став дека тој е се' уште проблематичен поради отсуство на опозицијата. „Оттука владата мора да креира клима на консензус што ќе придонесе за исполнување на стандардите кои не се за нас, туку за земјата дека таа оди кон функционална демократија“, смета тој.

За прашањето за неодамнешната изјава на Груевски дека може да се очекува негативен извештај од Европската комисија за напредокот на Македонија поради проблемот со Грција, Фуере одговори дека е прерано да шпекулираме за содржината на извештајот и многу е важно да не се минимизираат проблемите и „не е коректно надвор да се бараат оправдувања за внатрешните проблеми“.

„Проблемите се тука и тие тука мора да бидат решени", порача Фуере. Според него, грешките треба да се препознаат и соодветно да се третираат, а не тие да се сметаат како технички прашања, беше категоричен Фуере, додавајќи дека „македонските граѓани не се глупави и мора да им се каже вистината“.

За извештајот, Фуере рече дека во процесот на оценување на направеното засега имаше видлив прогрес во делот на судството и полицијата, но „исто така целта на извештајот е да ги нотира и недостатоците и ние сакаме Владата да не ги минимизира, туку да работи на нивно надминување“.

На критиките на Фуере одговараше Ивица Боцевски, кој повтори дека се исполнети 75 проценти од осумте препораки од ЕУ за добивање датум за преговори, додека преостанатите 25 проценти се во процес на реализација и „Владата има строга контрола на овој процес“. Во врска со изборниот процес, Боцевски рече дека целосно ќе бидат имплементирани препораките на ��ДИХР.

Но, за Боцевски спорот за името со Грција останува една од клучните кочници на македонското евроинтегрирање. „Ритамот на тапаните што доаѓа од главниот град на нашиот сосед Грција личи на истиот ритам од Букурешт. Оттука и очекувањата на граѓаните и политичката елита мора да бидат во линија со искуство дека кога Караманлис се заканува со вето - на крајот и ќе си го спроведе", вели Боцевски. Но, според него, сепак, ништо не може да го спречи македонското евроинтегрирање.

На седницата на Комисијата се разви жолчна дебата на обвинувања меѓу опозицијата и власта околу блокирањето на политичкиот дијалог и лошо спроведените избори. Најжестоки во тоа беа Игор Ивановски од СДСМ и вицепремиерот Боцевски. Ивановски од Владата побара „многу повнимателно и пофокусирано да се посвети на сериозна и здрава работа. Не мора толку да ги користи камерите, не мора толку да се употребуваат досетливи изјави на прес-конференции коишто се контрапродуктивни, туку би очекувале и од вицепремиерот Боцевски и од другите да ни соопштуваат успешни факти, бидејќи ова не е време за шеги", рече Ивановски.

Боцевски на тоа одговори дека „и во наредниот период имам намера да и' ги соопштувам на јавноста македонските успеси, со критика до Ивановски дека „пристоен разговор не е возможен доколку не се сослушаме“. „Рековте дека нудите помош и одговорност, па како за почеток би ве замолил да се сослушаме и да бидете присутни кога јас и другите ги изложуваме нашите приоритети", реплицираше Боцевски.