Поглед

Шопинг- манија

Билјана Ангеловска

Фала Богу, наскоро ќе нема потреба да одиме дури до Солун на шопинг. Ќе можеме да си пазариме дома, а да се чувствуваме како да сме во Грција. Новиот голем шопинг-мол, кој е предвидено да се гради пред самиот граничен премин Богородица, ќе ни го овозможи тоа задоволство. Ем ќе уживаме додека шопингуваме во западњачка атмосфера (трговскиот ќе биде по теркот на европските современи центри) ем ќе си ги заштедиме еврата, оти ќе пазариме во денари.

Можеби требаше државата порано да се сети да направи вакво нешто, уште додека имавме проблеми со визите, па не можеше секој да тркне до Солун кога ќе посака да си се поднови со нешто. Сега излегува дека потегот е малку задоцнет. Но, сепак, никогаш не е доцна за добра инвестиција. Државата ќе продаде илјадници квадрати земја, и тоа не по едно евро, туку по многу повеќе. По колку, ќе видиме откако ќе заврши лицитацијата, ама сигурно ќе биде многу поскапо од 60 денари, бидејќи почетната цена е 1.000 денари од квадратен метар. Од друга страна, кој и да го купи плацот пред границата со Грција, ќе изгради објект од 130.000 квадрати, значи ќе се ангажираат работници, потоа ќе се отворат многу работни места, ќе се трошат пари. Веројатно, ќе доаѓаат и Грците да остават некое евро во Македонија, доста само ние одевме кај нив.

Изградбата и егзистирањето на трговските центри по се' изгледа е најпрофитабилниот бизнис во нашава држава. Во Македонија не се ни гради нешто друго. Само трговски центри. И по некој споменик, се разбира. Очигледно, на Македонците им требаат токму вакви објекти, а не фабрики, болници, училишта. Згора на се', од трговските центри не паѓаат покриви како од болниците. Затоа се и посигурни. Па сега, нека рече некој дека е против вакви инвестиции. Ако смее!