Вакуум во издавањето пасоши

Не се знае кога МВР ќе почне да ги поместува термините за вадење пасоши и лични карти

Даниела Трпчевска


Слободни линии на Кол-центарот на МВР за аплицирање за нови документи, полупразни шалтери и кабини, видно намален притисок по ходниците во пасошките одделенија на МВР. По подолго време, вака изгледаат пунктовите за вадење на новите биометриски документи откако помина навалицата за вадење пасоши пред почетокот на летните одмори. Ако до пред само неколку месеци пред станиците за фотографирање имаше невидени метежи, а дневно беа закажувани термини за по неколку илјади граѓани, сега бројот на апликанти е сведен на десетици. Но, и покрај ваквата „релаксирана“ атмосфера, голем број граѓани се' уште не можат да дојдат до новите документи. Причината за тоа е банална – МВР се' уште не донело одлука да ги помести веќе закажаните термини и апликатите да ги уфрли во најблиските слободни термини за вадење документи. Згора на се', Кол-центарот и натаму закажува апликации за ноември 2011 година!

Вакуум-просторот што се случува веќе неколку недели во пасошките одделенија, се' уште не се знае кога би можел да биде решен. Иако надлежните во МВР најавуваа дека по годишните одмори ќе се разгледа можноста да им се излезе во пресрет на граѓаните и ќе им се овозможи што поскоро да ги добијат новите документи, очигледно дека целата процедура ќе се оддолжи.

Операторите на бесплатниот Кол-центар на МВР вчера закажуваа термини за нови биометриски пасоши и за нови лични карти за во ноември 2011 година, само неколку месеци пред истекот на важењето на старите документи, кои во 2012 година излегуваат од официјална употреба. Велат дека за поместување на термините никој не ги известил, ниту, пак, знаат кога тоа би можело да стартува.

За разлика од редовната постапка, за итните пасоши состојбата е сосема поинаква. Термин за итен пасош може да се добие за само еден ден!

Според статистиката на надлежното министерство, во изминативе три години се издадени 937.334 биометриски пасоши, 843.319 лични карти и 260.937 возачки дозволи.

Во изминативе години бројката на издадени пасоши се движела околу 800 до 900 илјади, но поради визната либерализација, претпоставките се дека таа сега би можела да достигне до еден милион граѓани што ќе аплицираат за нови пасоши изработени според европските стандарди.

Засега е сосема нејасно уште колку граѓани аплицирале и се' уште чекаат да ги добијат новите документи до 2012 година, со оглед на тоа дека дел од нив, во меѓувреме или нашле заобиколни патишта или платиле двојно повеќе за да ги добијат документите по итна постапка.

Извори од МВР велат дека се' уште се разгледуваат модалитетите и се размислува како да се прочистат списоците од апликанти што имаат нови документи, но се' уште фигурираат со закажани термини.

„Се' уште не е договорено како би можеле да се поместуваат термините и од кога “, вели помошникот министер за информирање во МВР, Иво Котевски.

Според него, се разгледуваат повеќе модалитети за да се изнајде најдоброто решение за што е планирано веќе на почетокот на идната недела да се оствари и средба во Министерството. „Штом ќе се донесе одлуката, ќе ја известиме јавноста“, вели Котевски.

Кошмарот со пасошите што траеше една година, се чини никако да заврши. Метежот спласна, но граѓаните и натаму се незадоволни и се жалат на пропусти во работењето. Иако повиците до Кол-центарот се драстично намалени, скопјани велат дека се' уште се прават пропусти во списоците, па и покрај тоа што аплицирале навреме, кога ќе дојдат пред шалтерите сфаќаат дека се изоставени од списоците. Една ваква грешка граѓаните ги чини многу – закажување нов термин, но овој пат во 2012 година!