Поглед

Чита ли Владата?

Мирче Јовановски

Ги чита ли Владата законите што самата им ги предложила на пратениците во Собранието?

Ова прашање се наметнува по информациите за назначување нов човек во Агенцијата за лекови, или како што е меѓу новинарите одомаќено, Бирото за лекови. Имено, на Владата и' беа потребни речиси два дена за да соопшти дек�� „нема донесено одлука за именување на Сашо Стефановски за нов директор на Бирото за лекови, како што објавија некои медиуми“ и дека за именувањето на првиот човек на оваа важна институција ќе станело збор на наредната владина седница.

Сега можеме само да шпекулираме дали соопштението ќе беше поинакво доколку медиумите не почнаа да прашуваат како е можно на толку важна и чувствителна функција, како што е раководењето со Агенцијата за лекови, да биде назначен човек речиси без искуство, со несоодветно образование (стоматолог, наместо фармацевт) и партиски експониран.

По се' изгледа, медиумите и' ги отворија очите на Владата да не донесе противзаконска одлука, упатувајќи ги службите да го прочитаат она што треба да го знаат, а тоа е член 13 од Законот за лекови, каде што децидно се вели дека „за директор на Агенцијата се именува лице со завршен Фармацевтски факултет, од редот на истакнатите стручни и научни работници, со работно искуство од најмалку десет години во струката“.

Циниците ќе кажат дека не станува збор за никаков превид, туку за политика позната под кратенката АПП (ако пројде - пројде), односно дека некој можеби се надевал, покрај толку имиња, да протне и некое што нема да биде воочено.

Како и да е, и овој пат не не' одминува впечатокот дека партизацијата на институциите фатила длабоки корени. После некој друг ни е виновен кога ќе констатираме дека работите не одат како што посакуваме.