Македоците се појавија, па ги снема од пописот во Бугарија

Првата статистичарка, сепак, изјави дека никој нема право да им каже на граѓаните како да се определуваат

Слободанка Јовановска

Нарекувајќи го „антинаучно и антибугарско“, ВМРО на Красимир Каракачанов се нафрли на споменувањето на Македонците и други етнички групи во анкетниот лист за пробниот попис во Бугарија, кој треба да се слу��и идната година, а веќе ја разбранува јавноста во земјата.

Сите бугарски медиуми вчера пренесоа дека премиерот Бојко Борисов, сепак, нема да ја казни за „скандалот“ директорката на Националниот институт за статистика, но по тоа, како беше пренесена веста, јасно е дека евентуална одлука за вклучување во пописот и на Македонците ќе предизвика политички земјотрес од голем размер во Бугарија.

Дали Борисов пушти пробен балон преку пробниот попис за одлука која станува неизбежна за земјата ќе се види идната година, но уште сега е јасно дека овој попис во Бугарија е прв што треба да се прави според стандардите на ЕУ и дека етничките права со Лисабонскиот договор станаа дел од законодавството на Унијата, па финтите во Стразбур не можат да поминат во Судот за правдата на ЕУ.

Тоа дека нешто, сепак, се случува говори фактот дека на официјалната веб-страница на Националниот институт за статистика во графата за етничко потекло нема воопшто Македонци или други малцинства, надвор од тие што вообичаено се појавуваа во претходните - Бугари, Турци, Роми и останати. Со оглед на тоа каква врева се крена во јавноста, очигледно е дека Македонците се протнале на мала врата во анкетните листови за пробното попишување, а за да се ублажи реакцијата, покрај нив се споменати и Африканци, Американци, Европејци...

Со образложение дека биле набројани групите што така се изјасниле во претходниот попис во 2001 година, во рамките на графата „останати“. Во тој попис, имено, во графата „останати“ над 5.000 бугарски државјани се изјасниле како Македонци, и тоа е набројано во сумирањето на резултатите.

„Маријана Коцева е специјалист со докажани вештини и професионални квалитети, како и со авторитет во Европа“, изјави вчера Борисов, бранејќи ја првата статистичарка. Одговарајќи на прашање зошто се вклучени бугарски муслимани, Македонци и Гагаузи кај етничката определба, Коцева одговори дека дека секој има право да се дефинира себе си како што сам ќе одлучи, па дури и како марсовец ако сака, а државата на тоа не може да влијае.

Претходно таа тврдеше дека графите со етнос, вера и јазик биле предложени од компјутерските експерти подготвувачи на пописот. Иако звучи наивно тие да го имаат главниот збор околу такво суптилно политичко прашање. Таа негираше, исто така, дека овој случај кореспондира со писмото на заменик-министерот за образование до регионалните инспекторати со кое се бара директорите на училиштата да ја утврдат етничката припадност на учениците, што кај Македонците во Бугарија се гледа како навестување дека Софија подготвува настава и на друг јазик освен бугарскиот, како резултат на притисоците од ЕУ.

Во ОМО Илинден-ПИРИН вчера ги следеа внимателно случувањата, очекувајќи дека, сепак, на пописот идната година Македонците ќе ги има во посебна графа, без оглед на политичките притисоци и демантирања. Сепак, политиката на премиерот Борисов кон македонското прашање ја оценуваат се' уште како нејасна.

Од ВМРО, пак, на Каракачанов, кои покрај Македонците ги разлути и споменувањето на „Гагаузи“ и „Бугаромохамеданци“ (Бугари со исламска верска определба), сметаат дека споменувањето на овие опции ќе го подели општеството по религиозна линија и ќе иницира други спорови. „Место да измислува етноси, бугарската држава треба на највисоко дипломатско ниво да бара графа ’Бугари‘ да се вклучи во пописите во Македонија, Албанија и во Грција“, порачуваат од ВМРО.