Поглед

Tајванскa кaнаста

Даниела Трпчевска

Васил Тупурковски и Јован Андонов-Реган не се виновни за тајванските кредити, пресудија највисоките судски инстанци. Велат дека нема доволно докази дека незаконски се делеле огромни суми пари во периодот од 1998 до 2000 година. За македонското судство нема ниту доволно аргументи кои ќе потврдат дали Тупурковски како директор на Агенцијата за обнова и развој навистина проневерил милиони евра и давал кредити од ракав без никакви критериуми.

Четири години по првата пресуда со која раководните лица во Агенцијата за обнова и развој беа осудени на затворски казни, судот на повторениот процес донесе ослободителна пресуда. Со тоа се заокружи повеќегодишниот судски процес и се затвори приказната со тајванската афера. Но, јавноста се уште не доби одговор кој ги зеде тајванските пари и кој ќе го враќа долгот кој грубо се пресметува на околу 2,4 милиони евра.

Тоа што првиот пат двајцата актери беа осудени на три, односно на две години затвор, е само еден неразјаснет аспект во целиот мозаик. Вториот е што, со новата пресуда, Тупурковски и неговиот заменик не мораат да вратат ниту денар од тајванската кредитна линија, која што била поделена на десетина фирми.

Листата на осумте фирми кои се нашле на сисокот за добивање на средствата од тајванската кредитна линија, преку Агенцијата за обнова и развој, пред неколку години беа јавно објавени, со сумите кои што ги добиле за развој на своите бизниси. Денес никој не може со сигурност да каже колку од нив вратиле и дали воопшто вратиле дел од земениот кредит.

Ако е точно дека дадените пари отишле во неповрат, многу е реално да се очекува дека „тајванската дупка“ во македонскиот буџет ќе треба да ја пополниме сите ние, на овој или оној начин.