11.09.2012, 14:27 Педесет вработени во Пиварница ќе останат без работа
Околу педесетина вработени во Пиварница „Скопје“ ќе останат без работа. „Соочена со тековните предизвици на светскиот и домашниот пазар, Пиварница ’Скопје’ почнува процес на организациско преструктурирање што треба дополнително да ги зајакне целокупните перформанси на компанијата и да ја обезбеди нејзината одржлива иднина.
Покрај останатото, овој процес се однесува на околу 50 работни позиции, од кои дел се од несуштинските дејности, а останатите се засегнати од модернизацијата на производството, за што е подготвена сеопфатна програма за преструктурирање“, соопштија денеска од компанијата. Од таму додаваат дека програмата за преструктурирање предвидува можност за финансиски пакет од 24 нето- плати по вработен.
Исто така, постои и можност која предвидува преземање на дел од вработените од страна на фирми со кои ќе се склучат договори за извршување услуги. „Паралелно со овој процес, Пиварница ’Скопје’ АД продолжува со интензивни вложувања во производството на пиво и безалкохолни пијалаци, каде што само во изминатата деценија беа инвестирани над 50 милиони евра. Целта на овие два паралелни процесa, интензивните инвестиции и континуираното зголемување на продуктивноста и ефикасноста е да се обезбеди одржлива иднина на компанијата и да се одржи нејзината силна позиција“, велат од компанијата. (Ек.Р.)
|
