Убиениот Британец на француските Алпи работел за воената индустрија

Британскиот инженер од ирачко потекло Саад ал Хили, кој беше убиен во Франција, заедно со сопругата и нејзината мајка, работел на тајни проекти за една од најголемите британски воени компании

Британскиот инженер од ирачко потекло Саад ал Хили, кој беше убиен во Франција, заедно со сопругата и нејзината мајка, додека беа на семеен одмор во реонот на француските Алпи, работел на тајни проекти за една од најголемите британски воени компании, објавија британските медиуми. 

Ал Хили бил дел од тимот на експерти, вклучен во е��ен таен проект, поврзан со компанијата ЕАДС, која проектира, изработува и лансира сателити по нарачка, кои како „око на небото“, се прават за комерцијални, цивилни, но и воени потреби. Во осумдесетите години на 20 век, убиениот инженер има работено и на еден таен нуклеарен проект за британската влада.

Весниците во Британија кои продолжуваат и натаму да му посветуваат големо внимание на злосторството во реонот на францускиот град Анеси, настојуваат да утврдат кој е мотивот за бруталната ликвидација на семејството на Ал Хили, во која настрада и еден француски велосипедист кој беше убиен само затоа што се најде на погрешно место и во погрешно време.

Француската полиција верува, а со тоа се согласуваат и британските полициски експерти дека станува збор за професионално убиство, изведено од професионалци кои обично не оставаат никакви траги зад себе. Сите тројца во автомобилот на Ал Хили се убиени со по два куршуми во главата, како што е убиен и велосипедистот, сведок на злосторството и како што се обиделе тоа да го направт и врз постарата ќерка, која сепак, го преживеа нападот и врз четиригодишната ќерка, која остана неповредена затоа што паднала под мртвите тела на двете жени, неоткриена од убиецот или убијците.

Полицијата во Лондон која помага во истрагата врши претрес на вилата на Саад ал Хили, а денеска ќе го испрашува неговиот брат, за кого претходно се тврдеше дека би можел да има мотив за нарачаното убиство, поради наводна семејна расправија околу наследството од нивниот покоен татко.