Поглед

Лекари (не)работници

Јасмина Јовановска

Јулската плата што според новиот модел по успешност беше поделена во здравството, едни лекари ги казни, а други ги награди. Казнетите лекари добија за еден до 20 отсто помали плати, а за толку проценти повисока плата добија наградените лекари.

Овој начин на плаќање- по учинок, предизвика големо разочарување кај лекарите. Тие велат дека иако работеле како и досега, па дури и нешто повеќе, сепак се казнети и не добиле цела плата.Новата плата, згора на тоа, ги подели лекарите на работници и неработници, а како што велат тие најлошото е што ќе мора да се „тепаат“ за земање на што повеќе пациенти под нивен надзор. Некои од лекарите велат дека за да заработат за цела плата, ќе мора на пациентите дури и да им измислуваат дијагнози за лекувањето да биде посложено и така да соберат повеќе поени.

На здравството секако му треба нов начин на вреднување на трудот на лекарите. Но, не таков што ќе му земе од платата на еден лекар за да му се даде на друг лекар. Ова ќе создаде раздор во лекарската средина, па нема да биде чудно ако лекарите почнат да се однесуваат како гладијатори во арена. А тоа не им приличи, зарем не?!

Јасно е дека идејата беше со новиот начин на плаќање на лекарите да се стави крај на еднаквото вреднување и на кои се пасивни, и оние лекари кои поактивно работат. Но, од друга страна, по масовниот лекарски егзодус од државното во приватното здравство, речиси стана невозможно да се „забушава“ на работното место во државните клиники од проста причина што има недостиг од лекари во смените.

Токму затоа, новиот здравствен систем треба да им обезбеди фер натпревар на лекарите за плата. Но, за тоа моделот за плата треба да биде добро осмислен и да биде дел од закон, а не само одлука, која може да се менува на кој како ќе му текне.