17.08.2012, 14:59 Вермален нов капитен на Арсенал
Венгер жали за продажбата на Ван Перси, но вели дека немале друг избор
Робин ван Перси ја презеде капитенската лента во Арсенал минатото лето, откако на Барселона и' беше продаден Сеск Фабрегас, а 12 месеци подоцна лидерското место меѓу „топчиите“ повторно се испразни откако Холанѓанецот замина во Манчестер јунајтед за 24 милиони фунти. Но, менаџерот Арсен Венгер многу лесно и бргу реши Томас Вермален да биде новиот капитен на Арсенал. Белгиецот досега беше заменик на Ван Перси, а на вчерашната прес-конференција Венгер соопшти дека таа функција ќе ја врши Микел Артета.
„Вермален беше заменик-капитен, затоа одлуката беше едноставна. Мислам дека во екипата имаме многу потенцијални капитени, но засега ќе остане вака“, разјасни Венгер.
Робин ван Перси ќе биде петтиот капитен што Арсенал го продал во последните седум години.
„Жалиме што изгубивме голем играч од една едноставна причина - му преостана само уште една година од договорот и сакаше да замине. Предвидовме дека може да се случи такво нешто и за тоа ги купивме Лукаш Подолски и Оливие Жиру. Не посакувавме да го продадеме на ривалот, но немавме избор. Само еден клуб беше заинтересиран на прифатливо ниво за нас, а тоа беше Манчестер јунајтед. На крајот на краиштата, тоа беше единствената одлука што можевме да ја донесеме“, објасни Венгер.
Ван Перси ќе дебитира за Манчестер јунајтед в понеделник против Евертон.
|
