18.08.2012, 23:01 Сонг во Барселона за 19 милиони евра
Каталонскиот гигант конечно се договори со Арсенал околу висината на трансферот на камерунскиот интернационалец
Алекс Сонг ќе стане најнов член на тимот на Барселона откако каталонскиот гигант конечно се договори со Арсенал околу висината на трансферот на камерунскиот интернационалец.
Двата европски гиганти веќе извесно време преговараа околу деталите од преселбата на 24-годишниот Камерунец на „Камп ноу“, за на крајот да биде договорено „топчиите“ да заработат 19 милиони евра од продажбата на овој фудбалер.
„Со задоволство можеме да објавиме дека постигнавме целосен договор со Арсенал за трансферот на Алекс Сонг. Договорено е сумата за отштета да изнесува 19 милиони евра, а сега го очекуваме фудбалерот да пристигне во Барселона и да ги мине лекарските прегледи, со што трансферот ќе биде комплетиран“ - се вели во клупското соопштение на каталонскиот гигант.
По заминувањето на Алекс Сонг, стратегот Арсен Венгер се надева дека ќе успее да го ангажира Нури Сахин од Реал Мадрид како освежување за средниот ред на „топчиите“.
|
