(ФОТО) Пандев за минимална победа против Литванците



Македонската фудбалска репрезентација забележа триумф од 1:0 на вечерашниот пријателски меч на националната арена „Филип Втори“

ФОТО: Петр Стојановски

Голот за победа го постигна капитенот на „црвено-жолтите“ Горан Пандев во 54. минута на асистенција на Ферхан Хасани.

Избраниците на в.д селекторот Гоце Седлоски ја имаа иницијативата и го диктираа темпото на играта во првиот дел, а тоа беше наградено на почетокот на вториот дел со погодок во мрежата на гостите. Тоа беше 25. гол за Пандев во дресот на Македонија, кој се покажа и како доволен за победа над Литванците.

До крајот на натпреварот мрежите на двете страни мируваа, а гостите не се ни заканија посериозно кон голот на Томе Пачоски. Хасани на додавање на Пандев имаше добра шанса во 73. минута, по што пет минути подоцна Пандев самиот имаше шанса за 2:0, но биеше непрецизно кон голот на Литванија.

Ова беше единствен тест за нашите репрезентативци пред двата квалификациски дуели со Хрватска и Шкотска, кои се играат следниот месец во битката за пласман на СП во Бразил 2014. година. Средби до кои веројатно ќе биде решено и прашањето за тоа кој ќе го наследи Тошак на позицијата селектор на фудбалската селекција на Македонија.