Бесими жали што не бил разбран за Слупчане

Не стивнуваат реакциите откако владини претставници се поклонија пред споменикот на УЧК

Горан Адамовски

„Градењето доверба се базира на меѓусебното почитување. Искрено жалам што не е целосно разбрано ова залагање за помирување, кое е во духот на Охридскиот договор, кој пак е составен дел на Уставот, а тоа е исклучително важно за иднината и просперитетот на Македонија“, изјави вчера министерот за одбрана, Фатмир Бесими, по понеделничкиот настан во кумановско Слупчане, каде што униформирани лица на АРМ се поклонија пред споменикот на паднатите борци на УЧК.

Министерот смета дека таквиот потег бил во согласност со Рамковниот договор, не смета дека направил нешто лошо и не планира да поднесе оставка, имајќи предвид дека од него се огради Владата. На прашање дали за настанот во Слупчане имало координација со претседателот и врховен командант на вооружените сили и со премиерот, Бесими се повика на Уставот.

„Институцијата претседател го дава своето ‘за‘ со самиот потпис на Охридскиот договор, што е составен дел од Уставот “, одговори Бесими по неформалната средба со поранешните министри за одбрана и началници на ГШ како дел од одбележувањето на јубилејот „20 години АРМ“.

Прашан дали ќе поднесе оставка, министерот уште еднаш се повика на вредностите од Рамковниот договор и Уставот, а со тоа, потенцира тој, не треба да има никаков страв од каков било аспект затоа што најсигурен гарант за иднината на земјава е граѓаните да се почитуваат меѓу себе.

Одговарајќи на прашањето какви се односите меѓу Генералштабот и МО, бидејќи тој е првиот министер за одбрана од чија постапка се огради началникот на ГШ, Бесими се повика на Законот за одбрана каде што, истакна, јасно се дефинирани односите на МО, ГШ на АРМ и претседателот.

„Пред вас сум како министер за одбрана на сите граѓани на Република Македонија, било да се Македонци, Албанци, Турци, Власи, Срби, Роми... Убеден сум дека најголем дел од граѓаните во Република Македонија ги поддржуваат насоките за градење заеднички живот и меѓусебно почитување како најсигурен гарант за иднината на државата“, рече министерот.

Иако Бесими смета дека не постојат тензии, против неговиот потег и вчера стигнаа еден куп реакции. Претседателот Ѓорге Иванов оцени дека не биле испочитувани институционалните правила и процедури. Тој побара да не се злоупотребува Армијата и употребата на армиската униформа за политички, партиски или какви било други цели. Инсистира надлежните да го расветлат случајот и да утврдат дали постои злоупотреба на службената должност.

„Униформираните лица во придружба на министерот за одбрана, не се во формацискиот состав на Армијата, туку се членови на Кабинетот на министерот“, стои во соопштението од Кабинетот на Иванов.

Но, тогаш се поставуваат низа прашања: кои се тие униформирани лица што се членови на Кабинетот на министерот, а не се припадници на АРМ? Зар Бесими околу себе има униформирани лица? На крајот на краиштата, тие носеа македонска униформа.

Заменик-премиерот Муса Џафери, кој беше дел од владините функционери што се поклони пред споменикот на УЧК, смета вакви настани не треба да се користат за кавга меѓу партиите и институциите.

„Ние одиме по институционален пат. Го почитувавме 13 август - Денот на Охридскиот рамковен договор и го направивме тоа во интерес на мирот. Нивното дело е ценето и нема потреба за вакви полемики. Не можеме да ја коригираме историјата, можеме да ја смениме сегашноста од 2001 година наваму. Да ги вреднуваме на достоинствен начин овие дела и да се надминеме себеси, затоа што е поважно да има мир отколку да се попречуваме меѓусебно и да има конфликт и нетолеранција“, нагласува Џафери.

Стево Пендаровски, кој е претседател на Комисијата за безбедност на СДСМ, објаснува дека во Рамковниот договор нема децидна одредба како се чествуваат спомен-обележја на загинати припадници од која било страна од конфликтот во 2011 година.

„Бесими се повикува на идејата за помирување, која е неспорно дека е градена како идеја по концепт на Рамковниот договор, меѓутоа помирувањето не се прави преку ноќ и не се прави со парцијални зафати на само дел од министрите во Владата. Помирувањето во историска смисла, и на континентот и пошироко, го предводеле политичките лидери. Во држава која е сериозно фрагментирана по етничка, по политичка и по која било друга линија, или политичкото раководство ќе демонстрира единство при обидите да се помириме или тоа ќе биде осудено на неуспех“, смета Пендаровски. Според него, во овој момент има две глави во Владата, два концепта за тој чин и сосема спротивни соопштенија за еден ист настан.

Македонски обединети сили сметаат дека со понеделничкиот настан се нарушува достоинството на македонските бранители и на меѓуетничките односи во Македонија и се создаваат услови за нивна ескалација. Обединети за Македонија бараат премиерот да ги разреши сите инволвирани функционери во овој случај.

Генералштабот и ВМРО-ДПМНЕ веднаш се оградија од Бесими. Генералштабот на армијата не бил информиран за настанот од МО.

Скандалот изби откако првпат офицери на АРМ стоеја мирно пред спомен-обележјето на УЧК во Слупчане. Припадниците на армијата беа придружувани од Фатмир Бесими, вицепремиерот Муса Џафери и заменик-министерот за внатрешни работи Џељал Бајрами.