Насловна

„Кралот на Ла Манш“ на 70 години ќе плива од Свети Наум до Охрид

Британецот Мајкл Рид, кој досега 33 пати го има препливано славниот канал, викендов ќе ги разбранува и охридските води

Миодраг Мицковиќ

Љубителите на пливањето и многубројните туристи во Охрид денеска или утре ќе бидат сведоци на несекојдневниот подвиг на еден од најпознатите маратонци во светот, 70-годишниот Британец Мајкл Рид, кој ќе се обиде сам да ја преплива традиционалната маратонска патека од Свети Наум до Охрид, долга 33 километри. Тој синоќа требаше да пристигне во Охрид, каде што ќе биде гостин на пливачкиот клуб Охридски бранови, како и на нашиот легендарен маратонец Нико Нестор, првиот Македонец што го има препливано Ла Манш.

Мајкл Рид е едно од на��познатите имиња на маратонското пливање во светот и ќе плива во водите на Охридско Езеро без оглед на тоа што неговиот настап нема да биде официјален, туку повеќе од ревијален карактер. Рид, кој има престојувано во Охрид пред десетина години, беше воодушевен од неговите убавини и од бистрите води на езерото и сега, иако во поодминати години, ќе се обиде да ја преплива патеката од Свети Наум до охридското пристаниште, сакајќи да покаже дека и постарите луѓе можат да ја препливаат оваа долга делница.

„Од моите пријатели меѓу помладите пливачи многу сум слушал за Охридско Езеро, кое имав можност да го видам, но не и да пливам во неговите води. Таа патека од Свети Наум до пристаништето во Охрид е мошне атрактивна и не е чудо што голем број пливачи од светот сакаат да ја препливаат. Ќе пливам и јас и верувам дека ќе успеам“, им кажа Рид на раководните луѓе на Охридски бранови во телефонскиот разговор со нив пред да тргне за Охрид.

Биографијата на Мајкл Рид е навистина богата. Во моментот тој е претседател на Здружението на каналските пливачи „Довер“ од Велика Британија, формирано во 1927 година. Тој е рекордер со 33 препливувања на каналот Ла Манш. Само во една година, во 1984, го има препливано шест пати, по што го доби и прекарот „Кралот на Ла Манш“, бидејќи тој рекорд досега не е соборен. Неодамна на голема свеченост одржана во Флорида стана член на „Куќата на славните“ како награда за извонредните резултати во отворени води. На Олимписките игри 1960 во Рим тој беше член на британската штафета 4х200 м слободно.