Пописот наближува, недовербата останува
На два и пол месеца пред почетокот на „пребројувањето“, не се решени несогласувањата во Државната пописна комисија
Светлана Унковска
Пописот на населението и домаќинствата во Македонија, кој прво беше закажан во април годинава, но мораше да се одложи откако изби несогласување меѓу членовите во Државната пописна комисија, а потоа и поради предвремените избори, ќе се спроведе наесен - од 1 до 15 октомври. Во исто време, ќе се пребројува и населението во соседна Албанија. Освен терминот, пописните операции во двете држави ги поврзува и тоа што Македонците во Албанија не веруваат во слободен и реален попис, слично како што и Албанците во Македонија немаат доверба.
Два и пол месеца пред почетокот на пописот, ситуацијата во Македонија е речиси иста како и пролетоска. Поради несогласувањата околу структурата на пописните парови, претставниците на Албанците и на Турците тогаш ја напуштија седницата на Пописната комисија со закана дека нема да учествуваат во натамошната работа, но оттогаш досега не се најде за потребно недоразбирањата да се надминат. Претседателката на Комисијата, Весна Јаневска вчера ни изјави дека технички се подготвени за пописот што значи дека се направени сите упатства и сите обрасци се испечатени, како и плановите за медиумското презентирање, но дека останало уште да се договори структурата на попишувачите.
„Државната пописна комисија за време на изборите и додека траеше изборната кампања направи пауза. Планираме да продолжиме со подготовките за одржувањето на пописот веднаш по формирањето на Владата. Откако имавме несогласувања со одредени членови на Комисијата ние формираме едно работно тело од пет членови кое уште тогаш одржа неколку состаноци. Начелно групата постигна договор за принципот на работа, а одржаа и неколку симулации за работата на пописните парови“, ни изјави Јаневска.
Во оваа петчлена работна група, чиј координатор е Љубомир Атанасовски, учествувале и претставници од албанската заедница - Јакуб Фетаи и од турската - Сали Мурати. Јаневска објасни дека симулациите се однесувале на тоа како би изгледале паровите што ќе ги посетуваат семејствата за да го спроведат пописот.
„Се' уште немаме постигнато договор, но симулациите покажаа како би изгледале пописните парови. Тоа значи ако во едно место мнозинство се жителите од албанска етничка заедница, а втори по
бројност се Македонци, тогаш имаме тим од Албанец и Македонец. Или ако најбројни се Албанци и Турци, со таков состав ќе биде и пописниот пар. Значи во зависност од тоа каква е структурата на населението во таа општина такви ќе бидат и паровите“, објасни Јаневска.
Таа најави дека веднаш откако ќе се изгласа Владата, ќе закаже состанок на Државната пописна комисија и очекува дека и членовите, кои во март ја напуштија работата, ќе присуствуваат на седницата и дека ќе бидат надминати недоразбирањата со што конечно ќе се деблокира работата. Во исто време ќе биде објавен и конкурс за попишувачи, но нејасно е што ќе се преземе ако и овој пат не се јават доволен број попишувачи од албанската етничка заедница.
На последниот состанок на Државната пописна комисија потпретседателот Абдулменаф Беџети и членови од турската заедница ја напуштија работата на Комисијата незадоволни од етничкиот состав на попишувачите. Вчера Беџети одби да одговара на нашите прашања, поради, како што ни рече, презафатеност. |
