Нов женски бренд
„Вомен анлимитед Маседонија“
„Вомен анлимитед Маседонија“ е формирана за сите жени без разлика на возраста, етничката и културната припадност, за сите оние што се соочуваат со некакви проблеми во своето секојдневно живеење и за оние што можат да придонесат и да помогнат во нивното решавање
Денеска, сабота 9 јули, во Националната галерија „Мала станица“, со почеток во 11,55 ч. преку интересни содржини и многу забава, македонските жени ќе можат да се запознаат со новиот женски бренд „Вомен анлимитед Маседонија“. Носител на проектот и организатор е „Коалицијата за одржлив развој - КОР“, а како донатор, поддржувач и поттикнувач на целиот проект е холандската амбасада. Во креирањето на програмата учество земаа многу влијателни жени и граѓански организации.
„Вомен анлимитед Маседонија“ е нова иницијатива која има за цел да ги обедини жените во Македонија. Таа е формирана за сите жени без разлика на возраста, етничката и културната припадност, познати или помалку познати, односно за сите оние кои се соочуваат со некакви проблеми во своето секојдневно живеење и за оние што можат да придонесат и да помогнат во нивното решавање.
Програмата за овој настан претставува целина од три области: економска независност, напредок во животот и кариерата и перцепции и стереотипи, според кои начелно се структурирани и темите на јавните интервјуа, работилниците, дебатите, и сето тоа со многу интересни соговорници и на еден интерактивен начин каде присутните не се пасивна и нема публика, туку активни учесници во дискусијата.
Покрај „дебатниот дел“, програмата ќе изобилува со многу интересни содржини, како што се дегустации на вино, изложби, катчиња за убавина, релаксација (јога, фенг шуи), забава, креативни катчиња и многу други содржини кои ќе го привлечат и ќе го задржат вниманието на посетителите и учесниците на настанот.
„Мојот сон беше во Македонија да се обезбеди една ваква женска иницијатива, која е огромна инспирација за жените од сите возрасти, националности, професии и потекло. Тоа е начин на решавање на прашањата поврзани со зајакнувањето и еманципацијата што одговара на 21 век. Комбинацијата меѓу сериозните содржини и забавните презентации е место каде што човек посакува да дојде. Жените поседуваат неограничени капацитети и таленти. И бидејќи е време тие уште повеќе да ги рашират крилјата и да ги развиваат своите соништа без ограничувања и аспирации, треба заедно да се дружиме уживаме на 9 јули!“ ги повика македонските жени г-ѓа Симоне Филипини, холандска амбасадорка, која на 15 јули ја напушта Македонија и заминува на нова должност на Флорида, САД. |
