Трендовска политика: Ручек за испитување на пулс

Скопјани вчера првпат присуствуваа на директни разговори со медијаторот на ОН, кој со премиерот имаше средба во кафе-ресторанот „Тренд“

Медијаторот на ОН за спорот околу името, Метју Нимиц, вчера ги почна официјалните разговори во неофицијален амбиент, односно во скопскиот кафе-ресторан „Тренд“ каде што имаше работен ручек со премиерот Никола Груевски, придружуван од нашиот преговарач и амбасадор во САД Зоран Јолевски и шефот на кабинетот на Груевски, Мартин Протоѓер. Ова е вторпат Нимиц да разговара за спорот во антиквизациско опкружување, откако минатиот пат со премиерот разговараше и повеќе вечераше во ресторанот „Пелистер“, на пет чекори од Воинот на коњ. Веднаш по средбата тој замина за Охрид, каде што требаше да му се придружи на генералниот секретар Бан Ки-мун, кој се очекуваше да долета доцна попладнето, и да ја почне од таму својата дводневна посета на Македонија.

Во Охрид попладнето Нимиц имаше закажани тет-а-тет разговори и со шефот на државата Ѓорге Иванов, но нема информации дали беше изнесена некоја иницијатива и со какви позиции настапуваше државниот врв на одвоените средби. И од кабинетот на претседателот на државата и тој на премиерот соопштија дека овојпат немало ни координативна средба за разговорите со Нимиц, што може да биде сигнал дека ништо ново нема да има од наша страна или, пак, дека очекувањата од разговорите не биле спектакуларни. Уште повеќе владееше атмосфера на некоординираност околу средбата, иако се најавуваше како многу битна за заживување на преговорите, а посетата на генералниот секретар како исклучителна шанса - бидејќи е втора на функционер од ваков ранг на ОН откако Македонија стана членка под проблематично име во организацијата.

На средбата Груевски го уверувал Нимиц дека е посветен на процесот, дека македонската страна има конструктивен пристап во преговорите и е подготвена да ги продолжи со динамичен дијалог, во интерес на изнаоѓање решение. Таков конструктивен пристап тој посакал и од грчка страна, односно и Атина да му даде приоритет на ова прашање зошто е значајно за перспективите на Македонија и регионот.

Премиерот искажал силна поддршка и за мандатот на медијаторот и неговите досегашни напори, а изразил и подготвеност за директни средби на највисоко ниво со грчката страна, во интерес на градење позитивна атмосфера и добар амбиент од значење за процесот.

Денес рано наутро Бан Ки-мун ќе ги изнесе своите ставови на прес- конференција со шефот на државата, но изминатата деценија и повеќе не се памети генерален секретар на ОН да излегол со предлог за спорот освен со пораката дека треба да се решава, така што тој дел од задачата останува во рацете на Нимиц. Посредникот од Скопје утре ќе замине за Солун каде што ќе се сретне со „другата страна“ од Привремената спогодба, т.е. со грчкиот претставник во разговорите за името, Адамантиос Василакис. Иако Атина ја оцени посетата како многу важна, и овојпат не најде за потребно да обезбеди повисоко политичко ниво за медијаторот, што е знак како гледа на моменталните преговори и колку е фокусирана.

Иако од разговорите во „Тренд“ не произлегоа детали, скопјани првпат присуствуваа на нив на дистанца, а меѓу сведоците двајца беа бивши министри, еден бивш амбасадор и други лица од јавниот живот. (С.Ј.)