Големо апсење на поранешни соработници на Љубе Бошкоски

Единаесет години по убиството на Марјан Тушевски во Скопје, Обвинителството бара да се отвори случајот

Даниела Трпчевска

По 11 години од убиството на Марјан Тушевски и Киро Јанев, кои беа застрелани при излегување од кафулето „ЗУ“ во скопската населба Капиштец, случајот почна да се расплеткува. Полицијата вчера изутрина приведе деветмина вработени и поранешни функционери во полицијата, кои се осомничени дека имале, но прикривале информации во врска со убиствата, или не презеле ништо за да го расветлат случајот. Меѓу нив е и поранешниот министер за внатрешни работи Љубе Бошкоски, кој вчера попладне беше донесен на распит во Основниот суд Скопје 1. Неофицијално, тој се сомничи за помагање, а меѓу приведените е и неговиот шеф на обезбедување. Тројца српски државјани се осомничени дека го извршиле двократното убиство на 37-годишниот Марјан Тушевски и 23-годишниот Кире Јанев. Еден српски државјанин и петмина Македонци се осомничени за помагање, но тие се недостапни за органите на прогонот и по нив се трага. Истрагата е покрената на барање на Обвинителството.

Како што дознаваме, истрагата во Обвинителството за случајот Тушевски се водела во изминатите шест месеци. По добивање на конкретни сознанија, Обвинителството се одлучило да покрене постапка против три лица како директни извршители на убиството и на уште 12-мина за помагање. Повеќе детали одбиваат да соопштат од Обвинителството, се' додека трае распитот на приведените. Од основниот суд во Скопје потврдуваат дека приведените веќе се изнесени пред истражен судија и ги даваат своите искази. Меѓу нив е и поранешниот министер Бошкоски, кој вчера попладне беше донесен во судот од затворот „Идризово“, каде што во моментов издржува петгодишна затворска казна.

„Сите приведени имаат ангажирано свои адвокати. Барањето за истрага пристигна од страна на Обвинителството коешто бара на приведените да им биде одредена мерка притвор“, велат во Основниот суд Скопје 1.

„Случајот Тушевски“ се отвора 11 години по свирепото двојно убиство. На 10 јули 2001 година, во вечерните часови, при излегување од кафулето „ЗУ“ во населбата Капиштец, убијците со огнено оружје најпрво стрелале во правец кон Марјан Тушевски. Со 11 огнострелни повреди бил убиен на самото место. Потоа тројцата извршители, според полицијата, пукале и во Киро Јанев, кој во моментот се обидел да избега од местото на убиството. Тој не успеал да им побегне на убијците. Еден куршум го погодил на оддалеченост од стотина метри, по што починал на самото место на коешто бил застрелан.

Покрај тројцата српски државјани, за кои полицијата има сознанија дека стојат зад двојното убиство, со случајот била инволвирана и поголема група на вработени во полицијата, кои знаеле што се случило, но не презеле ништо да го спречат и разрешат случајот. Дел од нив се во пензија, но има и такви кои се' уште се активни во полициските редови.

Љубе Бошковски и претходно беше повикуван на распит во врска со убиството на Марјан Тушевски, но наводно негирал каква и да е поврзаност со трагичниот настан. Семејството на Бошкоски за време на изборите и по нив неколкупати во јавноста споменуваше дека на Бошкоски „му се пакува афера“ поврзана со двојното убиство во Капиштец.

Стојанче Ангелов: Ова е политички и монтиран процес

„Стравот дека Љубе Бошкоски може да излезе на слобода е причина да биде наместен за убиство кое што се случило пред 11 години“, обвини вчера претседателот на „Достоинство“ Стојанче Ангелов. Според него, повикувањето на Бошкоски на распит за случајот Тушевски е политички мотивиран и монтиран процес.

„Пред неколку дена покренавме иницијатива за Законот за амнестија на Љубе Бошкоски и истиот ден не покрија со излегувањето на неколкумина членови од Обединети за Македонија кои преминаа во ВМРО-ДПМНЕ. Иницијативата сметаме дека има големи шанси да помине во Собрание и веќе имаме информации дека би ја поддржале и пратеници од власта. Токму тоа сметаме дека се крие зад најновата акција со приведувањето“, вели Ангелов.

Тој прашува зошто доколку имало информации за извршителите на убиството, се чекало шест години за да се отвори процесот. „Место да го ослободат се обидуваат доживотно да го затворат Бошкоски. Тие се убедени дека на тој начин партијата нема да постои. Но, тоа нема да се случи“, тврди Ангелов.