За исклучено парно ќе се плаќа 10 отсто од сметката

Ќе биде потребно 80 отсто од станарите да се согласат за исклучување од парно

Најдоцна до крајот на месецов Регулаторната комисија за енергетика, РКЕ, ќе го донесе новиот Правилник за топлинска енергија. Според вчерашната изјава на претседателот на РКЕ, Димитар Петров, корисниците кои се исклучиле од системот ќе треба да плаќаат 10 отсто од месечната цена од сметката од вообичаениот износ за греење во колективните згради. Доколку, пак, цел објект се исклучи од парно, граѓаните воопшто нема да бидат должни да плаќаат за топлинска енергија. На исклучените корисници, според РКЕ, ќе им се даде два до три месеца рок за прилагодување, односно додека им се пресметаат новите износи за плаќање.

Инаку, со оваа вчерашна најава од РКЕ се отфрлија шпекулациите дека корисниците кои ќе се исклучат од парното ќе плаќаат по 50 отсто од сметките.

Инаку, ќе останува според предлог верзијата на новиот Правилник, дека е потребно 80 отсто од станарите да се согласат за исклучување од парно. Со тоа, како што реагираа од Организацијата на потрошувачи, се нарушува правото на избор. Во забелешките на ОПМ до Регулаторите се вели дека правилата се нејасни и дека има одредби во Правилникот кои можат различно да се толкуваат, а кои ќе придонесат договорите со корисниците понатаму да можат да бидат предмет на судско разгледување и постапување. Според нив, најпроблематично е решението со кое тие што сакаат да се исклучат треба да добијат согласност од 80 отсто од потрошувачите кои живеат во колективните објекти. ОПМ смета дека може да се поднесе такво барање без условување. (М.Т.)