На прошетка низ Охрид

Убавините на градот под Самоуловите тврдини го воодушевија генералниот секретар на Обединетите нации

Елена Михајловска

Охрид - Убавините на градот под Самоуловите тврдини го воодушевија генералниот секретар на Обединетите нации Бан Ки-мун, откако вчера во рамки на кратката прошетка низ стариот дел на Охрид имаше можност да се запознае со дел од културните знаменитости кои припаѓаат на светското културно наследство заштитено од УНЕСКО.

Пред своето заминување од Охрид, каде што престојуваше во рамки на дводневната посета на Македонија, високиот гостин пријатно изненаден од она што го видел, истакнал дека жали што немал повеќе време целосно да го разгледа градот, па на своите домаќини им рекол дека ќе биде радосен доколку во иднина му се укаже можност повторно да дојде на Охридската ривиера.

Поради строгиот протокол и интензивната работна агенда, Бан Ки-мун придружуван од претседателот на Република Македонија, Ѓорге Иванов успеа да ги види комплексот Плаошник, црквата „Света Богородица Перивлепта“ и Галеријата на икони, но немаше време да ги посети црквата „Света Софија“ и Античкиот театар.

Љупчо Кумбаровски, кој во улога на кустос ја водеше важната делегација низ Охрид, вели дека Бан Ки-мун е многу непосреден, позитивен и исклучително љубопитен како гостин.

„За време на прошетката низ културните локалитети, генералниот секретар поставуваше голем број прашања. На Плаошник се интересираше за тоа од кој период датира манастирот и беше изненаден од фактот дека во рамки на комплексот има многу структури од 4, 5 и 6 век и од раното христијанство. Се интересираше за темелите кои се гледаат, а кога му објаснив дека станува збор за ранохристијански базилики и епископска палата, ме запраша дали има уште такви места во Охрид. Тој беше многу изненаден кога му одговорив дека целиот стар дел на градот лежи на те��ели на многу постари градби и дека се' уште има многу неоткриени работи“, ги раскажува своите впечатоци Кумбаровски, кој во својата досегашна кариера водел многу значајни делегации низ Охрид.

Бан Ки-мун особено се заинтересирал за животот и делото на свети Климент Охридски и прашал дали некаде може да го види ликот на овој светец. Кумбаровски му покажал икона со неговиот лик и му објаснил дека поради неговата голема интелигенција зографите секогаш го сликале со високо чело. Тоа му било прилично духовито на Бан Ки-мун, па рекол дека тој факт добро ќе го запомни. Тоа го потврди при посетата на Галеријата на икони, кога го препознал ликот на свети Климент.