Секој што има можност заминува од земјава

Бројките велат дека 447.000 луѓе се иселиле од земјава, заклучно со 2010 година, и според Светска банка Македонија е во групата со најмногу емигранти

Загубата на одделни видови на професии во форма на одлив на умови е особено изразена во Македонија. Според последниот извештај на Светска банка од земјава има висок степен на одлив на мозоци и практично секој кој има шанси да замине во странство го прави тоа.

Бројките велат дека 447.000 луѓе се иселиле од земјава заклучно со 2010 година, според што Македонија влегува во групата со најмногу емигранти. Земјава е рангирана на 23 место во групата од 25 земји со најмногу емигранти. Со 21,9 отсто емигранти од вкупното население земјава е во друштво со Западен Брег и Газа, Гранада, Самоа, Сао Томе и Принципе.

Од регионот, друштво ни прават Албанија со 45,4 отсто од населението во емиграција и Босна и Херцеговина со 38,9 отсто.

Македонците најмногу се иселуваат во Италија, Германија, Австрија, Словенија, Хрватска, Франција и во Канада.

Светска банка со години наназад го мери степенот на меѓународната емиграција. Од анализата на сооодносот на емиграни во Македонија според видот на образование најголем процент отпаѓа на високо образованите кадри. Ако се споредат овие податоци со домашната статистика ќе се види дека од 1995 година наваму овој вид на кадар заминуваат од земјата повлекувајќи ги со себе своите семејства без да продолжат да инвестираат назад во својата матична земја.

Но, она што е уште попоразителено е фактот што емиграцијата на оваа категорија млади луѓе од 1995 година е зголемена речиси двојно или од 14,3 отсто на 27,3 проценти.

Аналитичарите сметаат дека високата стапка на емиграција предизвикува потреси на пазарот на високо квалификуавната р��ботна сила, бидејќи тоа се кадри, особено во техничките области, кои продуцираат иновативност и развој во домашните компании. Иако, во периодот од 2006 до 2009 година во земјава има пораст на запишани студенти од 35 отсто, податоците покажуваат дека бројот на дипломирани студенти се намалува, освен во секторот општествени науки, каде што има раст.

„Зголемениот број на дипломирани во општествените науки и растот на емиграцијата и недостигот на технички и стручни професии во Македонија,

укажува дека голем број на дипломирани од техничките и другите стручни професии, секогаш кога имаат можност ја напуштаат државата“, велат домашните аналитичари. Тие порачуваат дека само подинамичен економски раст од над 6 проценти ќе создаде нови работни места и повисок животен стандард во земајва, што е клучен фактор на подолг рок барем да се стопира процесот на иселување од Македонија.

До високи проценти на раст земјава тешко доаѓа. Од 5 и 6 проценти економски раст земјава имаше пред светската криза, последниве години тој достигнува најмногу до 3 отсто, годинава главното прашање е дали воопшто ќе успее��е да оствариме раст.

Експертите бараат и да се зголемат инвестициите во образованието, за тоа да се насочи не само на формата туку и на содржината, односно квалитетот.

Но, покрај високо образованите кадри голем процент зазема и иселувањето на оние со ниско образование, над 12 отсто, а емиграцијата на оние со средно овразование е најмала, или околу 8 проценти, покажува извштајот на Светска банка.

Што се однесува до имиграцијата, оние што се доселиле во земјава бројката изнесува 129 илјади, или 6,3 отсто од целокупната популација, заклучно со 2010 година. Најголем процент кај доселениците отпаѓа на жените, или 58,3 отсто. Земји од каде што имигрираат во Македонија се Албанија, Турција, стбија, Босна и Херцеговина. (С.М.)