Поглед

Правила, што беше тоа?

Јасмина Јовановска

Во државните болници и клиники е во тек постапката за вработување на 200 лекари. Тие треба да го пополнат недостигот на стручен кадар, проблем што посебно се потенцира во државното здравство, откако од него си замина армија лекари во приватни болници или во пензија. За да се задржи нивото на стручноста на македонските болници, Владата реши испразнетите работни места да ги пополни со најдобрите млади лекари во државата. Министерството за здравство, дури, воведе и тестови за да провери колку кандидатите ја познаваат медицината и англискиот јазик. Со нив, како што беше речено, селекцијата ќе биде поправедна и ќе означи крај на вработувања по роднинска линија или по партиски клуч.

Но, очигледно дека тестовите за знаење, паднаа на првиот испит. Еден куп реакции од оштетените кандидати говорат дека ни тестовите не помогнаа да се отстранат сомневањата за партиски и со врски вработувања што со години ја носи здравството. Работа не добиваат најдобрите лекари, туку оние што имаат врски.

И ако до вчера само се зборуваше за тоа дека се „наместени“ вработувањата во здравството, сега и покрај тоа што има транспарентност, повторно се вработуваат деца на функционери, локални моќници. Некој ќе рече дека тоа го има отсекогаш и не само во здравството. Но тогаш, зошто мораа лекарите да полагаат испити. Или тие беа се само параван за јавноста.

Министерството за здравство, како и досега, ги игнорира реакциите за последниот конкурс за вработување. За него сите вработувања се регуларни и според критериумите. Ако е така, како може лекар со најдобар успех, да не се вработи, и местото да му го земе лекар што е со помало знаење. Или, секој може да постави критериуми кога е друг во прашање, а самиот не се придржува кон правилата.