Грција остро возврати

Грчкото Министерство за надворешни работи остро одговори на пораките на македонскиот премиер

Од нашиот дописник
Миркица Поповиќ

Атина - Грција не остана импресионирана од изјавите на македонскиот премиер по средбите со генералниот секретар на Обединетите нации, Бан Ки-мун. Непосредно пред пристигнувањето на медијаторот Метју Нимиц во Солун во средата вечерта, грчкото министерство со остро соопштение одговори на пораките на премиерот Никола Груевски, оценувајќи ја неговата реторика како арогантна, националистичка и насочена само за негови внатрешни цели.

Беше оценето дека македонскиот премиер не се обидел да ја искористи средбата за напредок, туку ја злоупотребил за ширење на пропаганда. Во Грција оценките по изјавите на Груевски и средбите со Нимиц се дека не се гледа некаква основа за брзо поместување и напредок во преговорите за името, иако медијаторот од Солун порача дека од двете страни слушнал дека постои волја за решение на спорот и се надева да се најде начин двете страни да се движат во правилна насока.

Нимиц во Солун се сретна со грчкиот преговарач Адамантиос Василакис во средата вечерта и за време на официјалната средба зад затворени врати во хотелот „Хајат“ вчера рано изутрината. Средбата беше информативна, за грчката страна да слушне што му било презентирано на Нимиц од македонска страна за време на дводневната посета и средбите со македонскиот државен врв. Василакис од своја страна по средбата нагласи дека никој не треба да се сомнева во волјата и желбата на Грција да се најде решение на спорот за името.

„Јасно е дека изјавите со многу емотивност, страст не помагаат, но грчката влада се обидува да направи се' што е можно за да можеме полека да се најде��е на правиот пат“, истакна Василакис. Грчкиот преговарач не сакаше да дава проценки дали по средбите со Нимиц гледа клима поместување, напредок во преговорите. Посочи дека прво ќе треба да пренесе во Атина што било разговарано со Нимиц, а потоа дека ќе биде направен секаков потребен напор за да се најде решение во преговорите. На новинарско прашање од грчка страна како ги коментира изјавите на Груевски за признавање на македонско малцинство во Грција и почитување на нивните права, враќање на имоти, можност за двојно државјанство, Василакис не сакаше да коментира упатувајќи ги новинарите своите прашања за овие изјави да му ги упатат на македонскиот премиер.

Медијаторот Нимиц пак, истакна дека и кај двете страни слушнал дека има волја за решение. „Во Скопје владата има интерес да се реши спрот, тоа е важно за нив, а добив уверување и од амбасадорот Василакис дека решавањето на спорот продолжува да е приоритет и за грчката влада. Двете страни велат дека сакаат да се реши спорот“, рече тој по средбата со Василакис.

Изјавите на Бан Ки - мун во кои тој слободно го користеше уставното име на нашата држава и предизвикаа медиумски интерес во Македонија, не наидоа на реакции во Грција. Она што беше остро критикувано беше реториката и соопштението од кабинетот на македонскиот премиер по средбата со Бан Ки-мун. Одговорот од грчка страна на ова соопштение беше дека се работи само за дел од постојаната, заморувачка пропаганда на македонската влада која се користи само за внатрешни цели.

„Арогантноста и националистичкиот популизам за внатрешни цели се лош водач“, истакна потпаролот на грчкото Министерство за надворешни, Григорис Делавекурас. Делавекурас потенцираше дека оваа постојана, повторувана до заморување пропагандна реторика на македонскиот премиер која служи само за внатрешни цели покажува дека Груевски не ја искористил средбата со Ки- мун за напредок во решавање на ��порот за името. „Напротив, се потруди да ја злоупотреби. Уште еднаш се ангажираше да продолжи да ја негува познатата пропаганда за слабоста или немањето волја од грчка страна. Тоа е неточно, лажно и постојаната непопустливост на премиерот Груевски во текот на неговиот мандат само го потврдува ова“, посочува Делавекурас.

За делови од соопштението, потпаролот на грчкото МНР истакна дека „за сите останати работи на кои се сетил премиерот Груевски, можам само да кажам дека таму кај што завршува логиката започнуваат фантазиите. За среќа, разумниот соседен народ се' помалку го слуша“.

Грчки аналитичари кои го следат спорот за името по овие средби коментираат дека не гледаат дека ќе има некакво забрзување или развој на настаните, напредок во преговорите за да се стигне побрзо до решение. Оценуваат дека може да се очекува зголемен притисок кон двете страни, меѓутоа дека не се знае колку условите во двете држави ќе помогнат да се реши побрзо името. Подобрување на климата се очекува да има само доколку вистински се види волја од двете страни да направат отстапки од црвените линии, нешто кое во моментов според нив не е цел на македонска страна.