Ламбринидис стана главен за човекови права во ЕУ

Грчкиот ексминистер е прв што е именуван од Брисел на оваа функција

Атина - Поранешниот шеф на грчката дипломатија, Ставрос Ламбринидис е именуван за прв специјален претставник на ЕУ за човековите права. На оваа функција тој доаѓа од септември како предлог на еврокомесарката за надворешни работи Кетрин Ештон. Неговиот мандат како специјален претставник за човекови права ќе трае до 30 јуни 2014 година, а негова функција ќе биде да ја подобри ефективноста на политиката на ЕУ во оваа сфера. Ештон истакна дека е многу задоволна што Ламбринидис ќе биде на оваа функција затоа што човековите права се еден од нејзините топ-приоритети и една од главните работи поврзани со се' што прави директоратот за надворешна политика.

„Ова е клучен сектор за мене и ЕУ. Со неговиот талент и големо искуство Ламбринидис ќе биде од големо значење за нас“, изјави Ештон. Одлуката изненади многу во ЕУ, а звучи шокантно за Македонија, особено што оваа земја е од тие што не ја ратификуваат Конвенцијата за малцински права, а таквите се бројат на прсти во Европа. Практично именувањето на Ламбринидис отвора уште една врата за грчка блокада на Македонија, која место да ги слуша нашите поплаки во оваа сфера, може да ни испорача барања, без оглед што Ламбринидис ќе го претставува Брисел а не Атина.

Ламбринидис беше министер за надворешни во владата на Јоргос Папандреу по Димитрис Друцас, а ја напушти функцијата откако беше формирана преодната влада на Лукас Пападимос кога во грчкото МНР дојде Ставрос Димас од Нова демократија. Ламбринидис претходно беше европратеник и човек од доверба на Папандреу. За потсетување, во периодот 1994-2004 Ламбринидис бил специјален советник и генерален секретар на Министерс��вото за надворешни работи, советник на Папандреу како министер за образование и заменик-министер за надворешни, како и шеф на кабинетот на Пангалос како министер за надворешни работи. Ја вршеше и улогата на потпретседател на ЕП, одговорен за меѓународни организации како ОН и ја водел групата за визи и имиграција во ЕП. За време на неговиот мандат Атина ја посети шефицата на дипломатијата на САД, Хилари Клинтон. (М.П.)