Да не се политизира „Семакедонската средба“ во Трново

Битола - Да не се политизира традиционалната погранична средба на Македонците од Егејскиот дел на Македонија, побара Здружението на Македонците од Егејскиот дел на Македонија, со седиште во Битола, како организатор и домаќин на настанот што во недела ќе се одржи во потпелистерското село Трново.

Организаторите на „Семакедонската средба“ никако не можат да го заборават собирот во 2010 година кој помина во знакот на тогаш уапсениот фармер Душко Илиевски, осомничен за одгледување марихуана. Тогаш пратеничката на СДСМ од Битола, Весна Бендевска и нејзиниот колега Јани Макрадули токму кога премиерот Никола Груевски се качи на бината, ги соблекоа кошулите и ги покажаа маичките со ликот на фармерот Душко, порачувајќи: „Јас сум Душко, уапсете ме“.

„Здружението и средбата се неполитизирани. Строго ќе бидат казнети сите оние кои ќе ја злоупотребат средбата, било да е поединец или група“, порача Александар Поповски, почесен претседател на здружението.

Сепак, и покрај определбата за деполитизација на настанот, на вчерашната прес-конференција не изостанаа и политички пораки.

„Ние како претседателство секогаш ќе ја поддржиме онаа влада која ќе се бори за правата на Македонците, за обезбедување повеќе работни места за да се вработат младите. Ама, ќе бидеме против сите што сакаат да го сменат уставното име на Република Македонија“, рече Поповски.

Огранизаторите досега испратиле преку 1.400 покани низ целиот свет.

Според Андон Шекревски, член на македонското здружение „Виножито“ од Лерин, пограничната средба во Трново треба секогаш да се афирмира, исто и панаѓурот во леринското село Овчарани, бидејќи таму се играат и пеат македонски песни и ора.

„Панаѓурот во Овчарани е најголем културен настан на Македонците од Егејскиот дел на Македонија кој се одржува уште од 1980 година. Сме издржале разни притисоци и заплашувања, но ќе продолжиме да се собираме сите Македонци од Леринско како и други гости. Со наша делегација ќе бидеме в недела и во Трново“ - рече Чекревски.

„Македонија е вечна“ ќе биде мотото на 32. традиционална средба на Македонците протерани од Грција. На средбата е предвиден настап на повеќе културно-уметнички друштва од државата со КУД „Гоце Делчев“-Битола и „Сирма Војвода“-Прилеп, како и една фолклорна група од Јапонија која го негува македонскиот фолклор. (А.Б.)