Што прават денеска

Натали Грубовиќ

- ТВ-водителка

Ги користам миговите за заслужен летен одмор. Деновиве сум во Будва, Црна Гора, и уживам во сите предизвици што ги нудат морето, сонцето, плажите, ноќниот живот... Едноставно ги уживам одморските денови и привилегијата да не се биде временски ограничен со обврски.

Марјан Георгиевски

- актер

Дојде и времето за одмор и малку да се земе здив од работата. Бидејќи не ги поднесувам тензиите на плажите и доброволното изложување на „сончевиот терор“, претпочитам одморот да го минувам на планина. Денеска во 10 ч. тргнуваме во „освојување“ на Пелистер, до езерата, преспиваме во Копанки, па утре продолжуваме со планинарење.

Мите Димовски

- музички продуцент

До крајот на неделава треба да завршам еден проект, "Шутка рома рап", на кој интензивно работев последниве месец и пол. Овој музички проект треба да биде издаден од странски издавач. Потоа, веќе можам да почнам да размислувам за одмор, па од септември да се посветам на нови проекти.