Лекарски вработувања: не е важно дали те бидува, туку дали имаш врски

На конкурсот на Градската клиника во Скопје ќе бидат примени лекари со слаб успех, а ќе отпаднат најуспешните

Јасмина Јовановска

Дали лекарите во македонските болници и клиники се вработуваат според успех, по партиски клуч или роднински врски. Оваа дилема се наметнува во јавноста особено по најновите реакции за конкурсот за девет нови вработувања во Градската хируршка клиника „Св. Наум Охридски“ во Скопје, или бивша градска болница. Кандидати кои конкурирале за работа во оваа болница, се жалат дека на конкурсот ќе бидат примени лекари кои биле со слаб успех, а ќе отпаднат најуспешните лекари кои освен со висок просек на оценки од факултет, најдобро ги минале тестовите за странски јазик и за стручност, а кои Министерството за здравство ги постави за да ги изберат најдобрите лекари.

Меѓу нововработените лекари, како што неофицијално дознаваме, ќе биде внука на скопскиот градоначалник, која била на трето место на ранг листата според успех, како и син на лекарката која се грижи за здравјето на сопругата на еден висок функционер од Владата, кој според резулатите од тестовите го освоил 13-тото место.

„Иако, сум втора на ранг листата со 81 поени не сум примена на работа. Но, затоа се вработени лекари кои се на 11,13, 15, 19 и 21 место на ранг листата и тоа со далеку послаб успех. Примени се лекари со 70 поени, со 69, со 64 поени, што е за 10 поени помалку пд мојот успех“, разочарано вели Билјана Андоновска, која нема објаснување зошто отпаднала од списокот на девет лекари кои ќе се вработат во оваа клиника.

Оваа лекарка ќе остане без работа, и покрај тоа што со сопствени средства учела да стане специјалист хирург. Оштетената лекарка е ќерка на Добрила Андоновска, познат пластичен хирург која работи во оваа клиника.

На работа во оваа клиника не е примен ниту прворангираниот лекар. Но, тој како најдобро рангираниот доктор на конкурсот за вработувања во јавните здравствени установи, ќе работи во кабинетот на министерот за здравство Никола Тодоров. „Во мојот кабинет имаше доктори од делот на јавното здравје, но немаше лекари кои што можат да ми помогнат од аспект на медицината – и тоа беше мојата намера. Намерата беше да се прати една таква порака дека најдобрите треба да бидат максимално искористени“, изјави неодамна министерот Тодоров, на прашањето зошто во кабинетот вработил лекар асистент.

„Списокот за вработување на нови лекари не е конечен, иако е готова ранг-листата според успехот на кандидатите. За вторангираниот лекар, иако има добар успех се' уште е дилема бидејќи, ако и таа се вработи, на клиника ќе бидат четворица вработени од исто семејство“, кратко ни изјави директорот на Градската хируршка клиника „Св. Наум Охридски“, д-р Јасмина Чабуковска, која не сакаше повеќе да коментира зошто беше ангажирана околу повредените лица од пожарот во Струмичко.Слични реакции за нерегуларности во вработувања во болниците имаше и за битолската болница. Родители се жалат дека нивните деца, иако освоиле високи поени и биле на трето место на ранг листата, работа добиле кандидати кои биле на 28 и 33 место на листата. И за овој конкурс се зборуваше дека се примени деца кои се блиски на локални моќници.

Од Министерството за здравство не ни одговорија како може да се вработуваат лекари со послаб успех, а на работа да не се примаат солидни лекари, кога тоа е и беше и намерата на конкурсот. Министерството се прогласи за ненадлежно за изборот на кандидати. „Министерството е надлежно за организацијата на системот и законско воспоставување на процедурите за вработување. Додека конкурсите и постапката за вработување ги спроведуваат самите здравствени установи и како единствен услов за вработување биле квалитетот и знаењето на кандидатот“, велат од Министерството за здравство.